Dramatík í kringum enska lands­liðið: Eldingar, hótelhávaði og njósnir

Það var baulað á enska landsliðið þegar það kom á hótelið sitt til að undirbúa sig fyrir 16-liða úrslitaleikinn gegn Mexíkó á HM – en það verður þó ekki stærsta vandamálið í Mexíkóborg.

Mexíkó og England mætast eftir miðnætti í kvöld og breska ríkisúrvarpið fór yfir allt það sem truflar enska hópinn fyrir leikinn.

Öryggisgæsla hefur verið aukin á hóteli enska liðsins eftir að Ekvador, sem mætti Mexíkó í 32-liða úrslitum í Mexíkóborg, lagði fram kvörtun til FIFA vegna hávaða.

Lið Thomas Tuchel stendur frammi fyrir frekari ógnum vegna veðurs, hæðar yfir sjávarmáli og jafnvel, að því er virðist, njósna.

Fyrir síðustu umferð var leikmönnum Ekvador vísvitandi haldið vakandi af stuðningsmönnum heimamanna, sem notuðu hátalara, lúðra og mótorhjól fyrir utan hótel liðsins seint um kvöld. Mexíkó vann leikinn 2-0.

Baulað fyrir utan hótelið

Ekvador gisti á Westin-hótelinu og England vildi halda dvalarstað sínum leyndum en áhyggjur voru uppi um að staðsetningin myndi leka út. Hundruð heimamanna biðu fyrir utan hótel þeirra þegar rúta enska liðsins kom á föstudag, þar sem sumir sungu „Mexíkó“ og aðrir bauluðu.

Meðlimir þjóðvarðliðs Mexíkó stóðu vörð við innganginn að hóteli Englands á meðan lögreglumenn í óeirðabúnaði stóðu við girðingar á götunni fyrir utan hótelið.

Leikmönnum og starfsfólki Englands verða boðin náttúruleg svefnlyf eða hvítur hávaði til að reyna að forðast svefntruflanir vegna hugsanlegs hávaða um nóttina.

Bara enn ein hindrunin

Sumir munu líklega einnig koma með eigin eyrnatappa eða svefngrímu.

„Ég verð ekki ánægður ef þetta vekur mig – ég skal vera hreinskilinn. Við sjáum til hvernig þetta fer en við munum takast á við þetta eins vel og hægt er. Þetta er bara enn ein hindrunin sem þarf að yfirstíga en við erum tilbúnir,“ sagði sóknarmaðurinn Morgan Rogers.

Auk hávaðans eiga sumir erfitt með svefn í mikilli hæð yfir sjávarmáli.

England kom tveimur dögum fyrir leikinn þar sem reglur FIFA fyrir þetta stig mótsins kveða á um að lið verði að halda að hluta til opna æfingu á svæðinu daginn fyrir leik.

Undirbúningur þeirra var truflaður á föstudag vegna óreiðukennds fimm og hálfs klukkutíma tímabils þar sem kom í ljós að FIFA íhugaði að flýta leiknum um sex klukkustundir vegna spár um óveður.

Enska knattspyrnusambandið og knattspyrnusamband Mexíkó voru bæði reið yfir tillögunni innan við 48 klukkustundum fyrir upphafsflaut og leikurinn hefst nú eins og upphaflega var áætlað.

Þannig að þótt leikurinn verði áfram klukkan sex að staðartíma er það háð veðri – og tafir eru mögulegar.

Síðasta leik Mexíkó gegn Ekvador á sama velli seinkaði um klukkustund vegna þrumuveðurs og eldinga.

Dagleg þrumuveður í Mexíkóborg

„Dagleg þrumuveður eru eðlileg í Mexíkóborg á þessum árstíma – en spár benda til þess að hættan á sunnudag sé sérstaklega mikil, og ef þessi veður þróast gætu þau orðið alvarleg,“ segir Ben Rich, veðurfréttamaður breska ríkisútvarpsins.

„Á sunnudag virðast þessi veður líkleg til að hafa í för með sér tíðar eldingar og einnig er hætta á haglélum. Þrumuveður nær yfirleitt hámarki um eða rétt eftir hæsta hitastig dagsins – seinnipartinn og fram á kvöld, sem gæti haft áhrif á upphafsflaut,“ sagði Rich.

„Að flýta upphafsflautinu hefði getað gert það að verkum að leikurinn færi fram áður en versta þrumuveðrið skellur á – þótt það sé vissulega ekki tryggt,“ sagði Rich.

Eru í mikilli hæð yfir sjávarmáli

England stendur einnig frammi fyrir þeirri áskorun að spila leikinn í mikilli hæð yfir sjávarmáli. Mexíkóborg er í um 2.240 metra meðalhæð yfir sjávarmáli, sem þýðir að minna súrefni er í boði.

Helst ættu íþróttamenn að dvelja í viku eða tvær í þeirri hæð til að leyfa líkamanum að aðlagast og framleiða fleiri rauð blóðkorn.

England kom til Mexíkóborgar aðeins tveimur dögum fyrir leikinn en á meðan hefur heimaliðið spilað alla sína leiki hingað til í mikilli hæð – einn í Guadalajara (1.500 m yfir sjávarmáli) og þrjá á Azteca-leikvanginum – svo leikmenn þeirra ættu að vera búnir að aðlagast vel.

Samkvæmt Daily Mail var ein ástæða þess að England seinkaði ferð sinni frá bækistöðvum sínum í Kansas City, Missouri, til Mexíkóborgar sú að forðast njósnir.

Vildi að leikplanið yrði leyndarmál

Löndin þrjú æfðu á föstudag í bækistöðvum sínum í Bandaríkjunum – eins og þau hafa gert á milli leikja allt mótið.

Hins vegar gæti aukadagur í Mexíkóborg hafa verið hagstæður í þetta skiptið. En Tuchel vildi að sögn tryggja að allar leikaðferðir sem hann prófaði á æfingum yrðu leyndarmál.

Í frétt blaðsins segir að æfingasvæði Englands í Kansas City hafi verið betur varið af lögreglu og öryggisvörðum gegn hugsanlegum njósnum en La Cantera, sem er æfingasvæði Pumas í Mexíkóborg.

Jú, að venju er mikil dramatík í kringum enska landsliðið á stórmóti en það er ekki oft sem þrjár „hættur“ herja á liðið á sama tíma.