Banda­ríkja­menn með fullt hús eftir tvo leiki

Bandaríkjamenn byrja þetta heimsmeistaramót af miklum krafti en þeir unnu 2-0 sigur á Áströlum í röðum leik sínum í kvöld.

Bandaríska liðið skoraði bæði mörkin sín í fyrri hálfleiknum en það vann 4-1 sigur á Paragvæ í fyrstu umferðinni. Bæði lið voru með þrjú stig fyrir leikinn.

Sex stig og sex skoruð mörk eru örugglega framar björtustu vonum gestgjafa Bandaríkjamanna á þessu heimsmeistaramóti enda er þetta í fyrsta sinn sem bandaríska landsliðið vinnur tvo leiki í röð á HM.

Eftir mjög sannfærandi fyrri hálfleik var bandaríska liðið alls ekki eins sannfærandi í þeim síðari. Þeir spiluðu fyrsta klukkutímann mjög vel og komust upp með að gefa aðeins eftir í lokin.

Ástralir sóttu talsvert undir lok leiksins en náðu aldrei inn markinu sem hefði sett mikla pressu á bandaríska liðið.

Fyrra markið var sjálfsmark Cameron Burgess strax á 11. mínútu en það kom eftir frábæran undirbúning Folarin Balogun.

Alex Freeman bætti svo við öðru marki á 43. mínútu, marki sem var fyrst dæmt af vegna rangstöðu en svo dæmt gilt eftir afskipti myndbandsdómara.