Potter spurður hvort það hafi hjálpað að vera ekki danskur

Graham Potter, þjálfari sænska landsliðsins í fótbolta, sat fyrir svörum á blaðamannafundi fyrir fyrsta leik Svíþjóðar á heimsmeistaramótinu í fótbolta. Danskur blaðamaður spurði hann hvort ástæðan fyrir því að það væri tekið vel á móti honum væri vegna þess að hann væri ekki danskur.

Potter var léttur í lund og sagðist ekki vita hvort eina ástæðan fyrir góðum móttökum Svía væri einfaldlega að hann væri ekki danskur.

Forveri Potters hjá sænska landsliðinu var Daninn Jon Dahl Tomasson sem var jafnframt fyrsti maðurinn ekki frá Svíþjóð til að þjálfa landsliðið í fótbolta. Gengi hans var vissulega ekki gott og náði Tomasson aðeins í eitt stig í fjórum leikjum í undankeppni heimsmeistaramótsins.

Þá tók Graham Potter við og náði ótrúlega að koma Svíþjóð á heimsmeistaramótið í gegnum umspil. Í umspilinu vann Svíþjóð Úkraínu og Pólland og náði sér þannig í farmiða á heimsmeistaramótið.

Fyrsti leikur Svíþjóðar á heimsmeistaramótinu er í nótt gegn Túnis. Svíþjóð er í F-riðli með Túnis, Hollandi og Japan.