Hags­munir barna á­gæt­lega tryggðir í „baga­legu óyndisúrræði“

Hlé var gert á þingfundi í dag eftir að mótmælendur létu í sér heyra á þingpöllum í umræðu um frumvarp dómsmálaráðherra um fyrirhugaða brottfararstöð. Eftir að þeim var vísað af þingpöllum héldu þeir áfram að mótmæla fyrir utan alþingishúsið.

Önnur umræða hófst í dag eftir umfjöllun í allsherjar- og menntamálanefnd. Fjöldi mannréttindasamtaka hefur mótmælt því að vista eigi börn í brottfararstöðinni og lagði meirihluti nefndarinnar til ýmsar breytingar þar sem skerpt er á réttindum barna, meðal annars að fjölskyldur eigi að vista í aðskildu húsnæði og að óheimilt verði að vista börn í öryggisklefum.

Samtökin No Borders stóðu fyrir uppátækinu og segja í yfirlýsingu á samfélagsmiðlum að með því vildu með tefja umræðuna og vekja athygli á frumvarpinu.

Beiti fyrir sér hagsmunum barna

Snorri Másson þingmaður Miðflokksins og varaformaður sagði þingheim hafa haldið ró sinni en mörgum brá bersýnilega í brún þegar hávært flaut barst um þingsalinn.

„Eftir á að hyggja er þetta ekkert sérlega merkilegt atvik,“ segir hann.

„Óskandi væri auðvitað að geta haft þingpallana opna í tiltölulega góðri vissu um að þangað komi fólk til að fylgjast með en ekki til að trufla störfin,“ segir Snorri.

Sjálfur segist hann hafa skilning á því að brenna fyrir málefnunum en að persónulega drægi hann þarna línu. Hann segist þó ekki telja að hagsmunir barna vegi þyngst meðal meðlima þessa hóps.

„Í flóknu og stóru máli sem þessu eru margir aðgerðarsinnar sem beita fyrir sér hagsmunum barna og öðru eins í svona umræðu, þegar kjarnaskoðunin sem þessi hópur stendur fyrir er miklu frekar sú skoðun að íslensk stjórnvöld eigi ekki að eiga síðasta orðið um það hver dvelur í þessu landi. Og það er skoðun sem ég held að sé mikil jaðarskoðun. Þótt þessi hópur hafi mörg tæki til að vekja á sér athygli og sé ágætlega laginn í því er þetta jaðarskoðun þannig að við megum ekki gera meira úr því er tilefni er til,“ segir hann.

Hagsmunir tryggðir eins og orðið getur

Stjórnvöld visti ekki börn í slíku „bagalegu óyndisúrræði“ af léttúð.

Þetta er neyðarúrræði á síðasta stigi málsins. Auðvitað geta menn bent á það og rætt en ég held að hópar eins og þessi svonefndu frjálsu félagasamtök, sem hafa gert alltof mikið úr þessum þætti, haldi áfram, þrátt fyrir töluverða vinnu inni í allsherjarnefnd til að koma til móts við þessi sjónarmið og tryggja að þessi umgjörð sé sem mannúðlegust, segir mér að það sé kannski frekar þessi málstaður opinna landamæra sem menn eru að tala fyrir frekar en hagsmuni barna sem eru að mínu mati, eins og orðið getur í svona bagalegu óyndisúrræði, ágætlega tryggðir,“ segir Snorri.