Ekkert vopna­hlé heldur um­fangs­miklar á­rásir í Rúss­landi

Meðal annars hafa Úkraínumenn ráðist á olíuvinnsluinnviði í Rússlandi og á skotmörk í Grozní í Téténíu.

Pútín lýsti nýlega yfir einhliða vopnahléi yfir daginn í dag og morgundaginn. Því höfnuðu Úkraínumenn og kröfðust í staðinn að gera ætti almennt ótímabundið vopnahlé. Það átti að hefjast á miðvikudaginn en Rússar hafa gert umfangsmiklar árásir á Úkraínu undanfarna daga.

Meðal annars réðust Rússar á leikskóla í Sumy á miðvikudaginn.

Nú í morgun virðast Úkraínumenn hafa svarað fyrir sig með umfangsmiklum árásum á Rússland. Varnarmálaráðuneyti Rússlands segir 264 úkraínska dróna hafa verið skotna niður, samkvæmt frétt Reuters.

Rússneska fréttaveitan RIA segir að ráðuneytið hafi gefið út yfirlýsingu um að brugðist yrði við þessum brotum Úkraínumanna á vopnahléi Pútíns. Rússar segja brotin að minnsta kosti 1.365 talsins.

Þá hafa Rússar hótað umfangsmikilli eldflaugaárás á Kænugarð, ef Úkraínumenn reyna að koma í veg fyrir hátíðarhöldin í Moskvu á morgun.

Vandræðagangur Rússa

Rússum hefur orðið lítið ágengt á víglínunni í Úkraínu um nokkuð langt skeið. Á sama tíma hefur mannfall meðal Rússa í Úkraínu verið mikið og drónaárásum Úkraínumanna gegn hernaðar- og olíuvinnsluinnviðum í Rússlandi hefur fjölgað töluvert.

Þá hefur hægt á hagkerfi Rússlands en það dróst saman um 0,5 prósent á fyrsta fjórðungi þessa árs. Seðlabanki Rússlands hafði spáð 1,6 prósenta hagvexti.

Í frétt Wall Street Journal segir að á undanförnum mánuðum hafi óánægja með stríðsrekstur Pútíns í Úkraínu aukist verulega. Öryggisstofnanir Rússlands hafa brugðist við með umfangsmiklum takmörkunum á internetinu, sem líkt hefur við kínverska eldvegginn svokallaða.

Fjölmiðlar ytra vitnuðu þar að auki á dögunum í skýrslu frá evrópskri leyniþjónustu þar sem fram kom að Pútín hefði látið auka öryggisgæslu kringum sig til muna og að hann hefði orðið sífellt meira einangraður.

Rússar halda á morgun upp á sigur Sovétríkjanna gegn Þýskalandi í seinni heimsstyrjöldinni. Þessi dagur hefur fengið sífellt meira vægi síðan Pútín tók við völdum í Rússlandi fyrir rúmum aldarfjórðungi en hátíðarhöldin hafa aldrei verið minni að sniðum en þau verða á morgun.

Erlendum blaðamönnum hefur verið meinaður aðgangur að hátíðarhöldunum.

Drónaárásir Úkraínumanna á Rússland, og þar á meðal á Moskvu, hafa leitt til þess að Pútín krafðist vopnahlés á meðan á hátíðarhöldunum stendur. Þá hefur verið dregið úr umfangi þeirra vegna öryggisógnar og aðgangur íbúa Moskvu að internetinu takmarkaður.

Innrásin í Úkraínu hefur nú staðið yfir lengur en stríð Sovétríkjanna gegn Þýskalandi.

Anastasia Kashevarova, fræg rússnesk kona sem stutt hefur innrásina í Úkraínu, er sögð hafa varpað frekara ljósi á það hvernig viðhorfið til stríðsins hefði breyst í Rússlandi á dögunum. Það gerði hún í færslu á samfélagsmiðlum þar sem hún sagði að í seinni heimsstyrjöldinni hefðu sovéskir hermenn verið þegar komnir til Berlínar.

„Og við hristum einhverra hluta vegna hnefa okkar og tölum einhverja vitleysu um rauðar línur.“