Fólkaflokkurinn fram úr Javnaðarflokknum

Fólkaflokkurin. sem er hægri íhaldsflokkur, fékk 26,7 prósent atkvæða, samkvæmt Kringvarpi Færeyja. Það er aukning um 7,8 prósentustig frá síðustu kosningum. Flokkurinn fær níu þingmenn.

Sambandsflokkurinn er næst stærstur með 21,5 prósent atkvæða. Hann bætti við sig 1,5 prósentustigi. Flokkurinn fær sjö þingmenn.

Javnaðarflokkurinn er með 18,9 prósent atkvæða, sem er 7,7 prósentustigum minna en í síðustu kosningum, og fær sex þingmenn.

Tjóðveldi er með 17,4 prósent atkvæða, sem er 0,3 prósentustigum minna en síðast, og fær einnig sex þingmenn.

Þá er Framsókn með 6,6 prósent atkvæða, sem er 0,9 prósentustigum minna en síðast, og fær tvo þingmenn.

Boðað var til kosninga í síðasta mánuði en áður átti ekki að kjósa fyrr en í desember. Ástæðan er deilur vegna veglínu Suðureyjarganga.

Sjá einnig: Boðaði þingkosningar í skyndi

Kjörsókn var 89,5 prósent.

Blaðamaður Vísis ræddi nýverið við Høgna í Jákupsstovu, fréttamann á Kringvarpi Færeyja, um kosningarnar. Hann sagði þá að stærsta verkefni landsstjórnarinnar hefði frá upphafi verið að ná sátt um gerð gangna til Suðureyjar sem yrðu einhver stærstu opinberu framkvæmdir í sögu eyjanna með tilheyrandi kostnaði. Að lokum hafi flokkarnir náð sátt um að bjóða göngin út en að Framsóknarflokkurinn hafi sett því það skilyrði að samhliða því yrði frumvarp um hækkun ellilífeyrisaldurs.

Það var samþykkt með miklum naumindum á Lögþinginu. Þá boðaði Aksel Johannesen, lögmaður Færeyja, til skyndikosninga.

„Þetta var svolítið óþokkabragð að vissu leyti. Það lítur þannig út. En maður getur alveg skilið það, hann var undir pressu því öll stéttarfélögin voru æf vegna frumvarpsins um eftirlaunaaldurinn. Það var ekki unnið í samráði við þau. Hann kaus að koma sinni áætlunargerð í gegn og boðaði svo til kosninga. Þannig má segja að hann nái að halda góðu sambandi sínu við stéttarfélögunum. Eða í það minnsta slétta þúfurnar,“ sagði Høgni.