„Ég efaðist um hversu mikinn kjark ég hefði í hjartanu“

Shiffrin átti tvær yfirburðaferðir við frábærar aðstæður og sýndi enn og aftur hvers vegna hún er af mörgum talin besti alpagreinaskíðamaður allra tíma.

Þetta var þriðji stærsti sigurmismunur í svigi kvenna á Ólympíuleikum, greininni sem hún vann sem ung stúlka í Sotsjí árið 2014 og staðfesti þar með stöðu sína sem skíðastjarna.

Tólf árum síðar stóð hún sig aftur í uppáhaldsgreininni sinni og tilfinningarnar brutust út á marksvæðinu eftir að hafa faðmað heimsmeistarann Camille Rast frá Sviss, sem hlaut silfur, og bronsverðlaunahafann Önnu Swenn Larsson frá Svíþjóð.

Eftir að hafa fengið gullverðlaunin um hálsinn þá skrifaði Shiffrin hjartnæman pistil inn á samfélagsmiðla sína.

Ótta, adrenalín og möguleiki á gagnrýni

„Ég komst þangað, þrátt fyrir ótta og adrenalín og möguleikann á gagnrýni og bakslagi frá fólki sem veit ekkert og reynir ekki einu sinni að skilja. Ég vann,“ byrjaði Shiffrin pistil sinn.

„Ég vann. Ég efaðist um allt sem ég hef lært í lífinu, mörgum sinnum í þessari viku. Ég efaðist um hversu mikinn kjark ég hefði í hjartanu og velti fyrir mér hvort ég ætti yfirleitt að vera að gera þetta. Ég efaðist um hörku mína og þrautseigju. Ég efaðist um allt. Og svo skildi ég þessar spurningar eftir,“ skrifaði Shiffrin.

Þau kusu samt að mæta með mér

„Ég vann. Ég lærði og óx með liðinu mínu. Við höfum átt samskipti og staðið sterk saman fyrir hvort annað. Þau hafa staðið sterk fyrir mig. Vitandi hverju við myndum berskjalda okkur fyrir á þessari leið, vitandi hvaða kröfur biðu framundan – þá kusu þau samt að mæta með mér. Þau velja það á hverjum degi,“ skrifaði Shiffrin.

„Ég vann. Ég horfði í kringum mig á alla jafningja mína og keppinauta. Ég velti fyrir mér hvort þeim liði líka svona. Ég fann fyrir stuttri gremju, af hverju þurfið þið öll að vera svona fjárri góð í þessu líka? Af hverju getur þetta ekki verið auðveldara?“ skrifaði Shiffrin. 

Góðviljuð, skilningsrík og harðsvíruð og sterk

„Og svo fann ég fyrir gríðarlegu þakklæti. Takk fyrir að ýta mér áfram. Takk fyrir að vera alltaf góðviljuð, skilningsrík og harðsvíruð og sterk. Takk fyrir að ryðja brautina, eða fylgja fast á eftir, svo að við, saman, getum brotið múra og lyft íþróttinni okkar á hærra plan,“ skrifaði Shiffrin.

„Ég vann. Ég f-g vann. Þetta, einmitt hér, er lottóið og ég vann. Ó, og ég fékk líka verðlaunapening,“ skrifaði Shiffrin eins og sjá má hér fyrir neðan.