„Ljúf­sárt og svo­lítið erfitt að kveðja kvik­mynda­húsin“

Mikil tímamót urðu í sögu kvikmyndahúsa landsins um helgina þegar dyrum Bíóhallarinnar og Sambíóanna í Álfabakka í Mjódd var lokað í síðasta skipti. Árni Samúelsson opnaði Bíóhöllina þann 2. mars árið 1982 sem þótti bylting á sínum tíma.

Skarphéðinn Guðmundsson, framkvæmdastjóri Sagafilm, neitar því að bíóhúsin muni hverfa fyrir fullt og allt.

„Ég held að það gerist seint að við gefum bíóið alveg upp á bátinn,“ sagði hann í viðtali í beinni útsendingu í fréttatíma Sýnar í kvöld.

„Þetta er einfaldlega liður í breytingum sem eru búnar að vera að eiga sér stað og breytingar í áhorfu hafa átt sér stað alveg frá því að við vorum fyrst að horfa á bíó.“

Hann viðurkennir þó að vegna streymisveitna hafi bíóaðsókn breyst.

„Við förum sjaldnar í bíó, en þegar það eru myndir sem við viljum sjá þá förum við á þær í bíó.“ 

Þetta sé liður í breytingum sem eigi sér stað um allan heim.

„Það er alltaf ljúfsárt og svolítið erfitt að kveðja kvikmyndahúsin. En þetta er liður í þróun sem er löngu hafin og að horfa á eftir svona bíóhúsi vekur upp minningar um allar stundirnar sem maður hefur átt í bíóhúsum.

Hann segist ávallt hafa kallað Sambíóin í Álfabakka sínu upprunalega nafni: Bíóhöllina. Þetta var algjör bylting þegar Bíóhöllinni var komið á fót.

„Þetta gekk út á annað og meira en hver sýndi hvaða bíómynd heldur líka aðstöðuna,“ sagði Skarphéðinn.