Vill af­henda Trump friðarverðlaunin

Machado var í viðtali við Sean Hannity á Fox News í gærkvöldi, þar sem hún fagnaði því að Maduro hefði verið komið úr embætti og sagði að 3. janúar yrði þekktur sem dagurinn þegar réttlæti sigraði harðræði. Um stóran áfanga væri að ræða, ekki bara fyrir íbúa Venesúela heldur einnig fyrir mannkynið.

Í viðtalinu ræddi hún einnig umdeildar kosningar í Venesúela árið 2024 en þá var henni meinað að bjóða sig fram. Ríkisstjórn Maduros lýsti yfir sigri eftir kosningarnar en umfangsmiklar vísbendingar um að niðurstaðan hafi verið allt önnur og stjórnarandstaðan hafi í raun sigrað kosningarnar með yfirburðum hafa síðan þá litið dagsins ljós.

Machado sagði Hannity að Maduro hefði komið í veg fyrir að hún mætti bjóða sig fram í kosningunum af því hann óttaðist hana og stjórnarandstöðuna. Þeim hafi þrátt fyrir það tekist að sigra við mjög krefjandi aðstæður.

Í kjölfarið fékk hún friðarverðlaun Nóbels, sem hún tileinkaði Donald Trump, sem hefur ítrekað talað um að hann hafi átt að vinna verðlaunin.

Hannity spurði Machado hvort hún hefði boðist til þess að gefa Trump friðarverðlaunin sem hún fékk. Það sagðist hún ekki hafa gert enn. Hún sagðist þó vilja gefa honum verðlaunin við fyrsta tækifæri.

Byggði ákvörðunina á greiningu CIA

Greining starfsmanna Leyniþjónustu Bandaríkjanna á stöðunni í Venesúela er sögð hafa bent til þess að besta leiðin til að tryggja stöðugleika í landinu væri að láta Delcy Rodríguez, varaforseta Maduros, stjórna ríkinu um tíma.

Samkvæmt Wall Street Journal segir greininguna hafa spilað stóra rullu í því að Trump hafi tilkynnt að hann vildi að Rodríguez stýrði ríkinu áfram en ekki Machado. Hann og embættismenn hans hafa þó sagt að henni væri hollast að fara eftir kröfum þeirra, því annars komi frekari loftárásir til greina eða mögulega yrðu hermenn sendir til Venesúela.

New York Times segir Trump hafa meiri áhuga á olíu í Venesúela heldur en að ýta undir lýðræði og að samband Machado við ríkisstjórn Trumps hafi farið versnandi að undanförnu.

Einnig sagður pirraður yfir verðlaununum

Washington Post hafði á dögunum eftir heimildarmönnum sínum að það að Machado hefði unnið friðarverðlaunin hefði spilað inn í þá ákvörðun Trumps að útiloka hana sem mögulegan arftaka Maduros.

Hún tileinkaði verðlaunin Trump en hann er sagður þeirrar skoðunar að hún hefði aldrei átt að taka við þeim og er sagður pirraður út í hana vegna þess.

„Ef hún hefði hafnað þeim og sagt: Ég get ekki tekið við þeim vegna þess að þau tilheyra Donald Trump“, væri hún forseti Venesúela í dag,“ sagði einn heimildarmaður WP úr Hvíta húsinu.

Trump neitaði því í viðtali við NBC News í gær.

„Hún hefði ekki átt að vinna þau. En nei, það hefur ekkert með ákvörðun mína að gera.“

Stephen Miller, einn æðsti ráðgjafi Trumps, ítrekaði í viðtali við CNN í gærkvöldi að Machado gæti ekki tekið við stjórn landsins að svo stöddu. Allir sérfræðingar væru sammála um það að herinn og öryggisstofnanir ríkisins myndu ekki fylgja henni.