Upp­gjörið: Haukar - Stjarnan 82-93 | Annað tap meistaranna í röð

Íslandsmeistarar Hauka máttu þola ellefu stiga tap er liðið tók á móti Stjörnunni í Bónus-deild kvenna í körfubolta í kvöld, 82-93.

Leikurinn fór heldur rólega af stað og bæði lið að þreifa sig áfram. Liðin búin að vera í stuttu stoppi vegna landsleikja og það tók smá tíma að finna smá takt. Bæði lið voru svolítið að tapa boltanum klaufalega í byrjun en það lagaðist eftir því sem á leið.

Það var mjög jafnt með liðunum eftir fyrsta leikhluta. Haukar leiddi leikinn eftir fyrsta leikhluta með tveim stigum 16-14.

Það voru mikil jafnræði með liðunum og þau skiptust á því að taka forystuna. Stjarnan átti í smá vandræðum með Amandine Toi og þá áttu Haukar í fullu fangi með Shaiquel McGruder undir körfunni.

Haukar fengu tækifæri á að jafna fyrir lok fyrri hálfleiks en vörn Stjörnunnar stóð vaktina vel. Þess í stað fékk Stjarnan lokaskot fyrri hálfleiksins og setti Greeta Uprus þrist til að loka fyrri hálfleiknum fyrir Stjörnuna og leiddu gestirnir með fimm stigum 37-42 í hálfleik.

Haukar voru fljótar að jafna leikinn í upphafi þriðja leikhluta en eftir það varð þetta gríðarleg barátta og gekk endana á milli. Haukar náði góðu áhlaupi en Stjarnan svaraði því. Eftir þriðja leikhluta leiddi Haukar með minnsta mun 61-60.

Þessi sama barátta og einkenndi leikinn teygðist vel inn í fjórða leikhluta. Stjarnan náði góðum kafla og stigu skrefinu framar en Haukar. Þær komu sér í bílstjórasætið og kláruðu að lokum leikinn með ellefu stiga mun 82-93. 

Atvik leiksins

Frábær kafli undir lok fjórða leikhluta þegar Stjarnan náði 10-0 áhlaupi sem sló Hauka alveg af laginu og kláraði leikinn fyrir þær.

Stjörnur og skúrkar

Hjá Haukum var Amandine Toi mjög góð og setti 23 stig. Krystal-Jade Freeman endaði stigahæst á vellinum með 30 stig.

Dómararnir

Kristinn Óskarsson, Jóhannes Páll Friðriksson og Dominik Zielinski voru á flautunni í kvöld.

Eitt og annað sem hægt væri örugglega að setja á út á en heilt yfir fannst mér þríeykið komast vel frá sínu.

Stemingin og umgjörð

Viðtöl

„Við viljum vera með mestu orkuna í fjórða leikhluta“

„Það er miklu skemmtilegara að vinna heldur en að tapa“ sagði Ólafur Jónas Sigurðsson eftir sigurinn í kvöld.

„Ég held að við höfum bara gert ágætlega í dag fyrir utan kannski svona nokkra hluti sem að ég er ekkert endilega sáttur með en ótrúlega ánægður með stelpurnar“

„Mikið jafnvægi yfir liðinu og margar sem voru að leggja í púkkið í dag“

Leikurinn var mjög jafn framan af en Stjarnan sigldi fram úr í fjórða leikhluta. 

„Við ætluðum að stjórna tempóinu í leiknum og mér fannst við gera það ágætlega. Við erum búnar að æfa ógeðslega vel í vetur og við erum í góðu standi. Við viljum vera með mestu orkuna í fjórða leikhluta þegar önnur lið eru þreyttari“

„Mér fannst við vera með ógeðslega mikla orku ennþá í fjórða leikhluta sem að ég held að hafi gefið okkur þennan sigur í dag“ sagði Ólafur Jónas Sigurðsson.