Nýr lög­reglu­stjóri fljótur að á­kveða sig og nýir vextir hjá Arion

Fjallað verður um málið í kvöldfréttum Sýnar, en fráfarandi ríkislögreglustjóri vildi ekki veita viðtal vegna málsins.

Arion banki hefur kynnt nýtt húsnæðislánaframboð, eftir að hafa áður stöðvað tímabundið veitingu verðtryggðra lána í síðasta mánuði. Við förum yfir málið með fjármálaráðgjafa í myndveri.

Heimsþing kvenleiðtoga hófst í Hörpu í dag. Fulltrúar fréttastofu voru þar og ræddu við forsvarskonu þingsins, auk stjórnmálakvenna sem það sóttu. Þeirra á meðal er fyrrverandi forsætisráðherra Skotlands og varautanríkisráðherra Úkraínu. 

Vinir Gunnfaxa hafa ákveðið að kaupa samskonar flugvél frá Bandaríkjunum til að skipta á henni og Flugfélagsþristinum sem fluttur var á Sólheimasand í sumar. Til þess hafa þeir hafið fjársöfnun.

Við verðum í beinni frá Grindavík, í dag eru tvö ár frá því að rýma þurfti bæinn vegna mikilla jarðhræringa, sem áttu eftir að hafa mikil áhrif á líf íbúa til framtíðar. 

Í sportinu verður rætt við eina fremstu íþróttakonu landsins sem er frá í lengri tíma vegna brjóskloss, og getur ekki varið Evrópumeistaratitil sinn í ólympískum lyftingum. 

Þetta og fleira til í kvöldfréttum Sýnar í opinni dagskrá á samtengdum rásum Sýnar, Vísis og Bylgjunnar klukkan 18:30.