Óskar láti gagn­rýnis­raddir úr Vestur­bæ sem vind um eyru þjóta

Tapið í gær sér til þess að KR situr í 10.sæti Bestu deildarinnar og aðeins stigi frá fallsæti. KR hefur skorað gommu af mörkum, er raunar það lið sem hefur skorað flest mörk í Bestu deildinni til þessa (31) en á sama tíma er KR það lið sem hefur fengið á sig flest mörk deildarinnar (32).

Heyra mátti stuðningsmenn KR baula á sitt lið eftir 6-1 tapið í gær. Þetta var fimmta tap KR á tímabilinu í tólf leikjum og í ítarlegu viðtali eftir leik í gær fór Óskar Hrafn yfir stöðuna. 

„Ég held það sé nauðsynlegt fyrir íslenskan fótbolta, að þetta KR verkefni sé til,“ sagði Óskar Hrafn meðal annars. „Ég held það sé bara þannig, svo geta menn verið ósammála mér, og ég hef fullan skilning að flestir skilja ekkert í því hvað við erum að gera. Vegna þess að undirliggjandi og grunn kenning flestra um íslenskan fótbolta er það að þetta snýst um að ná í þrjú stig í hverjum einasta leik. Ég er ekki tilbúinn að fórna mínum hugmyndum til þess að ná í þrjú stig í hverjum leik. Ég ætla hins vegar á einhverjum tímapunkti að ná í þrjú stig í sem flestum leikjum með minni hugmyndafræði. Ég er ekki tilbúinn að gera eins og Valur gerði í dag, sem er að eiga kannski 110 heppnaðar sendingar. Ég er ekki tilbúinn til þess. Það verður einhver annar að gera það, ég myndi bara fá æluna upp í kok og sennilega bara hugsa: Er ekki bara best að hætta þessu og fara að gera eitthvað annað?“

Sex stiga leikir framundan

Það er öllum orðið ljóst að Óskar Hrafn mun ekki kvika frá sinni hugmyndafræði og framundan eru risa leikir upp á framhaldið á tímabilinu að gera.

„Óskar ætlar aldrei að kvika frá þessu,“ sagði Baldur Sigurðsson, sérfræðingur í Stúkunni Næstu leikir eru FH heima, KA heima og ÍA úti. Þetta eru allt lið í kringum þá í töflunni. Við getum kallað þessa leiki sex stiga leiki. Sjáum til hvernig úrslitin verða í þessum leikjum en hann er ekki að fara breyta, ekki séns.“

Ólafur Kristjánsson tók síðan við boltanum.

„Við erum búnir að sitja hérna þátt eftir þátt og ræða þetta,“ sagði Ólafur Kristjánsson. „Liðið spilar stórskemmtilegan sóknarbolta og hefur ákveðna hugmyndafræði. Það sem er kannski athyglisverðast við þessa hugmyndarfræði eða nálgun er að oft byrja menn á því að koma stöðugleika á varnarleikinn og vinna sig þaðan inn í sóknarleikinn en Óskar velur að fara aðra leið. Það getur vel verið að það komi einhverjar gagnrýnisraddir úr Vesturbænum en Óskar lætur þær sem vind um eyru þjóta.“