Feneyjabúar æfir yfir glæsibrúðkaupi Bezos

Mikil leynd liggur yfir brúðkaupinu fyrirhugaða en vitað er að hátíðahöldin munu standa yfir í þrjá daga og um tvö hundruð manns eru á gestalistanum. Þar má samkvæmt heimildum AP meðal annars nefna Katy Perry, Ivönku Trump, Opruh Winfrey og Mick Jagger.

Sanchez og Perry skipuðu báðar áhöfn geimfarsins New Shepard, sem braut blað í apríl þegar hún varð sú fyrsta í sögunni til að vera einungis skipuð konum. Margir fögnuðu tímamótunum en aðrir sögðu geimskotið hégómafullt, tilgangslaust og sóun á auðlindum. Farið er í eigu geimflugfélagsins Blue Origin, sem Bezos stofnaði. 

Fjöldi feneyskra samtaka, þar á meðal baráttuhópar fyrir bættum fasteignakjörum og aðgerðum í loftslagsmálum hafa tekið höndum saman og efnt til mótmæla vegna brúðkaupsins.

Vilja skemma fyrir

Mótmælendurnir segja brúðkaupið til marks um viðamikla bresti stjórnvalda í ferðamannamálum. Þeir saka stjórnvöld um að forgangsraða þörfum ferðamanna framar þörfum íbúa. Aðgerðasinnar mótmæla því einnig að Bezos greiði ekki hærri skatta en hann gerir meðan hann auki á loftslagsvána með óumhverfisvænum lifnaðarháttum sínum. 

Þá hyggjast mótmælendur gera það sem í þeirra valdi stendur til þess að trufla hátíðahöldin, til dæmis með því að tefja umferð um bæði götur og skurði borgarinnar. 

Fyrr í dag mættu fulltrúar loftslagssamtakanna Greenpeace og „Allir hata Elon“ á Markúsartorg, aðaltorg Feneyja, og breiddu út stærðarinnar dúk sem á stóð „Ef þú getur leigt Feneyjar undir brúðkaupið þitt geturðu borgað hærri skatt.“

Samkvæmt umfjöllun AP voru lögreglumenn fljótir að fjarlægja dúkinn af svæðinu. 

Ráðamenn jákvæðir

Ítalskir og feneyskir embættismenn gagnrýna mótmælin harðlega og bjóða hjónin tilvonandi velkomin til landsins. Þá hefur feneysk umhverfisrannsóknarstofnun að nafni Corila komið Bezos til varnar og bent á loftslagssjóð hans. Stofnunin sjóðinn mikilvægt framlag til umhverfismála. 

Luigi Brugnaro borgarstjóri Feneyja hefur einnig sagt að hátíðin komi til með að hafa jákvæð áhrif á hagkerfi borgarinnar. 

Viðburðafyrirtækið Lanza & Baucina Limited sem skipuleggur brúðkaup Bezos og Sanchez hefur einnig komið þeim til varnar og sagt að parið hafi óskað eftir því að truflun á götum borgarinnar vegna brúðkaupsins verði sem minnst, samkvæmt umfjöllun PageSix.