Um­mæli Kol­brúnar blaut tuska í and­lit ung­menna

Vísir greindi frá því að við atkvæðagreiðslu á lögum um námsmat grunnskóla í gær hafi Kolbrún, sem mælti fyrir málinu á sínum tíma, látið þess svo getið að nefndarstörf hafi gengið vel ef frá væri talin tilraun minnihlutans til að fá handbendi sín fyrir nefndina.

„Fyrir utan að fá einhverjar fjóra unga krakka í framhaldsskóla sem búið var að sér velja og mögulega segja þeim hvað þau áttu að segja fyrir framan þingnefndina,“ sagði Kolbrún.

Kolbrún uppskar mikið kurr í þingsalnum með þessum ummælum og hafa þingmenn stjórnarsandstöðunnar gagnrýnt hana harðlega fyrir þau. Í hópi þessara fjögurra menntaskólanema, „handbenda minnihlutans,“ eins og Kolbrún kýs að kalla þau, eru Diljá Karen Kristófersdóttir Kjerúlf fráfarandi inspector scholae og Úlfhildur Elísa Hróbjartsdóttir. Þær segja farir sínar ekki sléttar og að þær verðskuldi afsökunarbeiðni frá stjórnarþingmanninum.

„Ég er alls ekki sátt. Að háttvirtir meðlimir Alþingis láti svona orð falla í þingsal. Þau áttu kannski að vera særandi fyrir Snorra Másson og flokkinn hans en ásakanirnar lenda á okkur saklausum,“ sagði Diljá í samtali við fréttastofu.

Ummælin niðrandi og lítilsvirðandi

Pétur Orri Pétursson, nýstúdent frá Verslunarskólanum, segir ummæli Kolbrúnar til marks um áhuga- og virðingarleysi hennar í garð ungs fólks. Hann skrifaði skoðanagrein á Vísi dag.

„Þessi ummæli eru niðrandi, ekki bara fyrir okkur fjórmenningana, heldur eru þau blaut tuska í andlit ungs fólks sem vill taka þátt í lýðræðislegri umræðu og beita sér gagnvart löggjafanum. Orð Kolbrúnar eru til vitnis um skort hennar á virðingu gagnvart því unga fólki sem reynir að taka þátt í þjóðfélagsumræðunni á einn eða annan hátt. Að halda því fram að við séum bara einhvers konar „peð“ í höndum Snorra Mássonar eða Jóns Péturs Zimsen er í besta falli hlægilegt,“ segir hann.

Hann segir augljósar glufur í frumvarpinu sem samþykkt var í gær sem gild ástæða er fyrir að hafa áhyggjur af. Fjórmenningarnir hafi vonast eftir samtali við allsherjar- og menntamálanefnd til að koma áhyggjum sínum á framfæri.

„En það er sárt að segja það: því miður hef ég enga trú á því að Kolbrún Baldursdóttir og félagar hafi minnsta áhuga á því að hlusta á rödd okkar ungmennanna. En áhugaleysið er ekki nóg, hún ákvað að lítilsvirða sjónarmið okkar og afskrifa þau án þess að vita nokkuð um okkur eða hvað fyrir okkur vekti,“ segir Pétur.

Dræmar undantektir

Hann segist vona að Kolbrún Baldursdóttir sjái sóma sinn í að biðja ungmennin afsökunar á ummælum sínum.

„Við, ungt fólk í þessu landi, eigum að geta tekið þátt í þjóðfélagsumræðunni og komið sjónarmiðum okkar á framfæri, án þess að vera dregin í svaðið af alþingismönnum með lítilsvirðandi hætti,“ segir Pétur Orri Pétursson nýstúdent.

Kolbrún Baldursdóttir birti færslu á samfélagsmiðlum í gær þar sem hún brást við fréttaflutningi Vísis af ummælum sínum. Þar segist hún ekki hafa getað á sér setið eftir ræðu Vilhjálms Árnasonar um samráð nefndarinnar með ungmennum. Færslan hefur fengið heldur dræmar undirtektir en sem stendur hefur þrem líkað við hana, tveir brugðist við með reiðum kalli og þrjár athugasemdar hafa verið gerðar við hana sem láta allar í ljós neikvæða skoðun.