For­stjóri Út­lendinga­stofnunar vildi skýr svör frá Víði um um­sókn Os­cars

Þetta kemur fram í samskiptum Víðis Reynissonar, formanns allsherjar-og menntamálanefndar, við Kristínu Völundardóttur, forstjóra Útlendingastofnunar, og Sigríði Björk Guðjónsdóttur, ríkislögreglustjóra, sem Spegillinn á RÚV fékk afhent í dag. Fjallað er um málið í Speglinum og á vef RÚV.

Í samskiptum þeirra kemur fram að Útlendingastofnun hafi farið yfir allar umsóknir um ríkisborgararétt til Alþingis. Umsóknirnar séu frá 337 einstaklingum og af þeim séu nítján sem þegar hafi verið tilkynnt að eigi að flytja út landi samkvæmt lista frá embætti ríkislögreglustjóra.

Kristín segir í tölvupósti að ef Útlendingastofnun ákveði að fresta flutningi Oscars úr landi þyrfti Útlendingastofnun að gæta jafnræðis og bíða einnig með flutning hinna 18 sem hafi fengið samskonar tilkynningu og hann um brottvísun. Það væri fordæmisgefandi aðgerð sem gæti leitt til þess að fólk virði ekki ákvörðun sem hafi verið tekin um brottvísun heldur sæki um ríkisborgararétt til Alþingis til að komast undan henni.

Fengi Útlendingastofnun upplýsingar um að Alþingi ætlaði að veita Oscari ríkisborgarétt væri hægt að leggja mat á aðstæður hans að nýju. Í frétt RÚV um málið segir að Víðir hafi svarað þessum tölvupósti um klukkustund síðar og greint frá því að yfirgnæfandi líkur væru á því að Oscar fengi ríkisborgarétt. Samkvæmt frétt RÚV svarar Kristín þeim tölvupósti til að staðfesta að þetta eigi ekki við um hina 18 sem Víðir staðfestir tíu mínútum síðar.

Fjallað var um það á Vísi í gær að Víðir Reynisson, þingmaður Samfylkingarinnar og formaður allsherjar- og menntamálanefndar, hafi tekið sjálfstæða ákvörðun um að hafa samband við Útlendingastofnun og láta vita af því að hinn sautján ára gamli Oscar fengi líklega ríkisborgararétt. Brottflutningur sem átti að fara fram í dag hafi hvorki verið góð meðferð á skattfé né einstaklingi í ljósi stöðunnar.

Víðir sakaður um trúnaðarbrest

Sigríður Á. Andersen þingkona Miðflokksins sagðist í umræðum á þingi í dag undrandi á framgöngu Víðis og sakaði hann um að hafa brotið trúnað við allsherjar- og menntamálanefnd.

Hún er ekki ein um að hafa gagnrýnt málsmeðferðina, en samflokksmaður hennar Snorri Másson sagðist fyrr í dag gera verulegar athugasemdir við vinnubrögð Víðis. Hann hafi með ákvörðun sinni haft pólitísk afskipti af málinu. Um það bókaði Snorri á fundi allsherjar- og menntamálanefndar í morgun.

Guðrún Hafsteinsdóttir, formaður Sjálfstæðisflokksins, lagði einnig fram bókun á fundi allsherjar- og menntamálanefndar þar sem hún gerði athugasemdir við vinnulag Víðis og að hann hafi haft samband við Útlendingastofnun. Guðrún var til viðtals í Reykjavík síðdegis í dag um málið ásamt Víði Reynissyni.

Guðrún segist líta svo á að þetta séu pólitísk afskipti. Það sé mikilvægt að gæta jafnréttis og það séu allir jafnir fyrir íslenskum lögum og allir sem sæki um dvalarleyfi hér upplifi að það sé þannig.

Víðir segir meðferð Alþingis á umsóknum um ríkisborgararétt í eðli sína pólitíska. Málin séu eins misjöfn og þau séu mörg.

Guðrún segist ekki vilja ræða einstaka mál. Það séu eflaust fleiri einstaklingar í hópnum sem hafi verið tilkynnt um brottvísun og það eigi ekki að vera sjálfgefið að sá hópur eigi að vera tekinn út fyrir sviga. Guðrún sagðist hafa verið þeirra skoðunar lengi að þegar fólk er búið að fá úrlausn sinna mála á tveimur stjórnsýslustigum um að uppfylla ekki hæfi til verndar þá sé sjálfgefið að það fari í gegnum það ferli að fá ríkisborgararétt hjá Alþingi. Það sé mikill munur á þessu tvennu og Alþingi setja niður að fjalla um fjölda umsókna á ári frá fólki „sem falla ekki að kerfinu eða fá synjun“. Það eigi að vera undantekning að fá ríkisborgararétt í þessi ferli.

Hún segir ekki til verklag um störf undirnefndar sem fer yfir þessar umsóknir og það þurfi að koma því á.

Víðir segist ekki hafa brotið trúnað við nefndina eða reglur heldur hafi hann fylgt samvisku sinni. Guðrún segir það heita geðþóttaákvörðun. Hægt er að hlusta á viðtalið í heild sinni hér að ofan.