Birta Sól­veig fer með hlut­verk Línu Langsokks

Birta útskrifaðist af leikarabraut Listaháskóla Íslands árið 2024 og lauk áður söngnámi. Hún þreytti frumraun sína í Þjóðleikhúsinu í söngleiknum Stormi og lék Auði í Litlu hryllingsbúðinni hjá Leikfélagi Akureyrar. Fyrr í vikunni hlaut hún tilnefningu til Grímunnar sem leikkona ársins í aðalhlutverki – fyrir sitt fyrsta hlutverk í atvinnuleikhúsi. Í vetur lék hún einnig í sýningunum Frost og Yermau.

Í tilkynningu frá Þjóðleikhúsinu kemur fram að mikil eftirvænting hafi ríkt um hver færi með hlutverk Línu í þessari metnaðarfullu uppfærslu. Sýningin verður heljarinnar sjónarspil sem höfðar til breiðs aldurshóps.

Fimm flottar Línur

Eldri leikkonur sem hafa áður túlkað hina ástsælu Sigurlínu Rúllugardínu Nýlendínu Krúsimundu Efraímsdóttur í atvinnuleikhúsi hittust í vikunni og buðu Birtu velkomna í hópinn. Meðal þeirra eru Sigrún Edda Björnsdóttir, Margrét Vilhjálmsdóttir, Ilmur Kristjánsdóttir og Ágústa Eva Erlendsdóttir.

Leikstjóri sýningarinnar er Agnes Wild, sem hefur vakið mikla athygli fyrir frábærar barnasýningar. Karl Olgeirsson er tónlistarstjóri og má m.a. nefna einstaklega vel heppnaðar útsetningar hans á lögunum í Kardemommubænum. Finnur Arnar hannar leikmynd, Eva Björg Harðardóttir sér um búninga, Elma Rún Kristinsdóttir er danshöfundur og Ásta Jónína og Björn Bergsteinn hanna lýsingu. Þórarinn Eldjárn er þýðandi verksins.

Lína Langsokkur er meðal ástsælustu barnabóka hins vestræna heims og hefur notið gríðarlegra vinsælda meðal barna á Íslandi. Hún er óborganlega skemmtileg og uppátækjasöm, en sagan er einnig mannleg og falleg. Lína Langsokkur þykir frábær fyrirmynd – en nú eftir rúma viku verður því fagnað víða um heim að 80 ár eru liðin frá því að Astrid Lindgren skapaði þessa ástsælu persónu.

Nánar um sýninguna á vef Þjóðleikhússins.