Banda­ríkin í­hugi að draga sig úr friðar­viðræðum Rúss­lands og Úkraínu

Utanríkisráðherrann tilkynnti þetta í París í dag eftir samtöl Bandaríkjanna, Úkraínu og fulltrúa Evrópuþjóða. Fullyrt er að nýafstaðnar viðræður þeirra í Frakklandi hafi skilað sér í langþráðum áfangasigri þegar þjóðirnar komu sér saman um drög að næstu skrefum að friði.

AP-fréttaveitan greinir frá þessu. Gert er ráð fyrir því að nýr fundur verið haldinn í London í næstu viku og gaf Rubio til kynna að framvindan þar geti ráðið úrslitum um það hvort Bandaríkjastjórn taki áfram þátt í viðræðunum.

„Þetta er ekki stríðið okkar“

„Við erum núna að nálgast þann stað þar sem við þurfum að ákveða hvort þetta sé mögulegt eða ekki,“ sagði Rubio við fréttamenn. „Vegna þess að ef það er það ekki, þá held ég að við munum bara snúa okkur að öðru.“

„Þetta er ekki stríðið okkar,“ bætti Rubio við. „Við höfum önnur forgangsmál til að einbeita okkur að.“ Hann fullyrti að Bandaríkjastjórn vilji taka ákvörðun um framhaldið „eftir nokkra daga.“

Ummæli utanríkisráðherrans koma á sama tíma og Bandaríkin og Úkraína nálgast samkomulag um að veita Bandaríkjunum aðgang að gríðarmiklum jarðefna- og olíuauðlindum Úkraínu og stofnun fjárfestingasjóðs til að fjármagna enduruppbyggingu í Úkraínu. Sú vinna hefur verið samtengd friðarviðræðum Donald Trumps Bandaríkjaforseta. 

Trump sagði í gær að ríkin væru komin með jarðefnasamning og undirrituðu fjármála- og efnahagsráðherrar Úkraínu og Bandaríkjanna í dag viljayfirlýsingu um að klára slíkt samkomulag.

Viðræðurnar hafi samt verið gagnlegar

Þrátt fyrir vaxandi óþolinmæði Bandaríkjanna sagði Rubio viðræðurnar í París í gær hafa verið uppbyggilegar. „Enginn hafnaði neinu, enginn stóð upp frá borðinu eða gekk í burtu.“ Þá hafi aðkoma Bretlands, Frakklands og Þýskalands verið gagnleg.

Ráðamenn í Rússlandi hafa hafnað þeim hugmyndum um alhliða vopnahlé sem Trump hefur talað fyrir og Úkraína jafnframt fallist á. Rússar gera það að skilyrði að Úkraína geri hlé á stríðsrekstri og hætti að taka við erlendum vopnasendingum. Úkraína hefur ekki viljað fallast á þetta.  

Árásir halda áfram

Rússar halda áfram árásum á úkraínskar borgir, að sögn embættismanna þar, og særðu fjölda óbreyttra borgara nokkrum dögum eftir að flugskeyti drápu að minnsta kosti 34 á pálmasunnudagshátíð í borginni Sumy í norðurhluta landsins.

Einn lést og yfir 60 aðrir særðust þegar Rússar réðust á Kharkív, næststærstu borg Úkraínu, snemma í dag, að því er neyðarþjónusta Úkraínu greinir frá. Borgarstjórinn Ihor Terekhov sagði að klasasprengjum hafi fjórum sinnum verið skotið á „þéttbýlt“ hverfi.

Rússneskir drónar réðust einnig á bakarí í Sumy, innan við viku eftir árásina þar síðasta sunnudag. Einn viðskiptavinur fórst í árásinni og starfsmaður særðist, að sögn svæðissaksóknara.

Mannskæða árásin á Sumy á pálmasunnudag var önnur stórfellda eldflaugaárásin sem kostaði óbreytta borgara lífið á rúmri viku. Um 20 manns, þar á meðal níu börn, létust 4. apríl þegar flugskeyti hæfðu Kryvyi Rih, heimabæ Selenskí Úkraínuforseta.

Fréttin hefur verið uppfærð.