Andrea skaut Blikum á­fram í úr­slita­leikinn

Berglind Björg Þorvaldsdóttir, sem fór frá Hlíðarenda í Kópavoginn fyrr í vetur, tók forystuna fyrir Breiðablik á 19. mínútu með fínni vinstri fótar afgreiðslu eftir fyrirgjöf Samönthu Smith.

Snemma í seinni hálfleik átti Fanndís Friðriksdóttir frábært skot, sem small í stöngina inn, og jafnaði leikinn fyrir Valskonur gegn sínu uppeldisfélagi.

Útlit var fyrir vítaspyrnukeppni en á lokamínútu leiksins átti Andrea Rut Bjarnadóttir lúmskt skot sem skoppaði í fjærhornið og tryggði Breiðabliki sigur.

Breiðablik mun því mæta annað hvort Þór/KA eða Stjörnunni í úrslitaleik Lengjubikarsins en undanúrslitaleikur þeirra fer fram á mánudaginn. Úrslitaleikur Lengjubikarsins verður spilaður föstudaginn 28. mars.