Helmingslíkur á að Glódís verði með í lands­leikjunum

Glódís sat allan tímann á varamannabekknum þegar Bayern München tapaði fyrir Lyon, 0-2, í fyrri leik liðanna í átta liða úrslitum Meistaradeildar Evrópu í gær. Glódís lék fyrstu 53 mínúturnar þegar Bayern vann Wolfsburg, 3-1, í þýsku úrvalsdeildinni á föstudaginn en missti af leik gegn Köln 9. mars.

Glódís er í íslenska landsliðshópnum sem var kynntur í dag en óvíst er hvort hún geti spilað leikina gegn Noregi og Sviss.

„Glódís er meidd eins og er og það er bara 50/50 hvort að hún verði með. Það skýrist í verkefninu. Þetta er beinmar í hné. Þetta er búið að vera að angra hana í svolítinn tíma. Síðan þegar hún byrjaði að æfa aftur eftir síðasta landsliðsverkefni þá versnaði þetta. Ég er í ágætis samskiptum við þá [Bayern] um þetta og þetta kemur bara í ljós,“ sagði Þorsteinn Halldórsson landsliðsþjálfari á blaðamannafundi í dag. Að hans sögn var Glódís ekki leikfær í gær þrátt fyrir að hafa verið á varamannabekknum.

Glódís er næstleikjahæsta landsliðskona Íslands frá upphafi með 133 leiki. Eftir því sem næst verður komist hefur hún ekki misst af landsleik vegna meiðsla síðan landsliðsferilinn hófst 2012.

Ísland er með eitt stig eftir fyrstu tvo leiki sína í riðli 2 í Þjóðadeildinni. Íslendingar gerðu markalaust jafntefli við Svisslendinga en lutu í lægra haldi fyrir Frökkum, 3-2.

Ísland mætir Noregi 4. apríl og Sviss fjórum dögum síðar. Báðir leikirnir fara fram á AVIS-velli Þróttar í Laugardalnum.