Eldar í Hollywood: Hneyksla sig á tryggingum, leigu og launum

Eins og fram hefur komið eru gróðureldarnir í Los Angeles þeir mestu í manna minnum. Tala látinna hefur hækkað í borginni, er komin upp í 24 og er sextán hið minnsta saknað. Eldarnir brenna nú á þremur stöðum en tugir heimila í borginni hafa orðið eldinum að bráð. Mikill fjöldi Hollywood stjarna hafa misst heimili sín þar sem þau eru í Pacific Palisades hverfinu.

Kardashian til varnar slökkviliðsmönnum

Bandaríska athafnakonan og stórstjarnan Kim Kardashian fer mikinn á samfélagsmiðlum vegna eldanna. Þar hvetur hún Gavin Newsom ríkisstjóra Kaliforníu til þess að beita sér fyrir því að lágmarkslaun slökkviliðsmanna verði hækkuð. Hún segir álagstaxta slökkviliðsmanna hafa numið einum dollara frá árinu 1984.

„Hann hefur aldrei hækkað í takt við verðbólgu. Hann hefur aldrei hækkað þegar eldar versna og margir hafa látið lífið,“ skrifar athafnakonan. Hún hvetur Newsom til að gera eitthvað sem enginn ríkisstjóri hafi gert í fjóra áratugi, að hækka laun slökkviliðsmanna.

Sakar tryggingafélög um græðgi

Bandaríski kvikmyndagerðarmaðurinn og leikarinn Tyler Perry segir að honum þyki ógeðfellt að fylgjast með hátterni bandarískra tryggingafélaga í Los Angeles. Hann fer mikinn á samfélagsmiðlum og segir þau hafa sagt upp milljónum trygginga húsnæðiseigenda í Los Angeles.

Bandaríski miðillinn Los Angeles Times greinir frá því að hin ýmsu tryggingafélög í Kaliforníu hefðu ákveðið að endurnýja ekki samninga við viðskiptavini í borginni. Ástæður sem gefnar hefðu verið upp hefðu verið þær að húsnæðið væri á svæði sem væri í hættu vegna gróðurelda.

„Finnst engum það ógeðfellt að tryggingafélögin geti hirt milljarða af samfélögum í áraraðir og svo skyndilega vera kleyft að segja upp milljónum samninga fólks sem þau gerði þau rík?“ skrifar kvikmyndagerðarmaðurinn á Instagram.

Þar segist hann hafa fylgst með ungri stelp nota garðslöngu til að sprauta vatni á hús hennar til varnar skógareldunum. Það hafi hún gert þar sem samningum þeirra við tryggingafélag þeirra hafi verið sagt upp af félaginu. „Þetta er fólk sem hefur greitt sín gjöld allt þeirra líf og eiga nú ekkert, vegna einskærrar græðgi.“

Önnur Kardashian systir hjólar í borgarstjórann

Systir Kim Kardashian, Khloé Kardashian er gríðarlega ósátt við viðbrögð Karen Bass borgarstjóra Los Angeles við gróðureldunum. Hún gekk svo langt að kalla borgarstjórann brandara. Hún er meðal fjölmargra íbúa sem neyðst hafa til þess að yfirgefa heimili sín.

Komu skot Kardashian í kjölfar þess að slökkviliðsstjórinn Kristin Crowley kvartaði sáran undan því að hafa ekki fengið frekari fjármuni fyrir slökkviliðið sem hún hefði beðið um fyrir mánuði síðan. Khloe Kardashian sagðist standa með slökkviliðsstjóranum.

„Ég stend með ÞÉR Crowley!!! Þú sagðir sannelikann og varst með tárin í augunum, ég sá að þú vildir ekki segja þetta en þetta var SANNLEIKURINN. Takk fyrir að vera hreinskilin! Bass borgarstjóri, þú ert brandari!“

Segir leigusala nýta sér neyðina

Bandaríski fasteignasalinn og raunveruleikaþáttastjarnan Jason Oppenheim, sem gerði garðinn frægan í raunveruleikaþáttunum Selling Sunset, segir leigusala nýta sér neyð þeirra sem neyðst hafa til þess að flýja heimili sín vegna gróðureldanna.

„Það eru lög um hækkanir í Kaliforníu sem eru einfaldlega virt að vettugi núna, þetta er ekki tíminn til þess að vera að nýta sér aðstæður. Það er líka ólöglegt að nýta sér náttúruhamfarir,“ segir Oppenheim. Hann segist sjálfur vita um slík dæmi og nefnir einn sinna viðskiptavina sem hafi lent í því að leigusali hafi beðið um hærra verð.

Oppenheim segir ástandið í borginni hræðilegt. „Það eru allir með tárin í augunum allan liðlangann daginn, bókstaflega vegna reyks en líka vegna þess að það eru gríðarlegar tilfinningar sem fylgja því að sjá svona marga eiga um sárt að binda.“