Segir Bjarna ekki hafa ruglast og Pawel fari sjálfur með rangt mál

„Við horfum upp á það núna að Kópavogur og Reykjavíkurborg eru í ágreiningi um vaxtarmörk höfuðborgarsvæðisins. Þetta er auðvitað ekki boðlegt. Það er land sem er til reiðu og hægt að byggja á. En Reykjavíkurborg neitar og vill stunda meiri þéttingu,“ sagði Bjarni Benediktsson forsætisráðherra í kappræðum RÚV á föstudagskvöld.

Pawel Bartoszek, frambjóðandi Viðreisnar og varaborgarfulltrúi flokksins, segir í Facebook-færslu að Bjarni hafi þarna ruglast á sveitarfélögum.

„Það hafa ekki komið neinar formlegar óskir frá Kópavogi um stækkun vaxtarmarka sem Reykjavíkurborg hefur tekið fyrir og neitað. Einfaldur lestur fundargerða svæðisskipulagsnefndar leiðir það í ljós,“ segir hann.

„En Kópavogur neitar!“

Pawel segir að hins vegar komið fram formlegt erindi frá Garðabæ um stækkun vaxtarmarka á svæði sem heitir Rjúpnahlíð. Markmiðið með þeim breytingum hafi verið að stuðla að auknu framboði húsnæðis með rými fyrir athafnasvæði.

„Svæðisskipulagsnefnd samþykkti að auglýsa umrædda tillögu og greiddu báðir fulltrúar Reykjavíkurborgar atkvæði með því. Hins vegar var málið tekið fyrir í bæjarstjórn Kópavogs og fellt þar. Ástæðan fyrir því voru grenndarsjónarmið og það má að sjálfsögðu sýna þeim virðingu. En engu að síður skal rétt vera rétt,“ segir Pawel í færslunni.

Því finnst honum að Bjarni hefði átt að segja: „Við erum að horfa upp á það núna að Garðabær og Kópavogur eru í ágreiningi um vaxtarmörk höfuðborgarsvæðisins. Það er auðvitað ekki boðlegt! Það er land sem er til reiðu og hægt að byggja á. En Kópavogur neitar!“

Rifjar upp innlegg „frá Píratanum knáa“

Nú hefur Hildur Björnsdóttir, oddviti Sjálfstæðisflokks í Reykjavík, tjáð sig á Facebook og andmælir þar skrifum Pawels. Hún rifjar fyrst upp þegar bæjarstjórn Kópavogs undirritaði viljayfirlýsingu um uppbyggingu húsnæðis að Gunnarshólma, svæði utan skilgreindra vaxtarmarka höfuðborgarsvæðisins og viðbrögð við henni.

„Formaður umhverfis- og skipulagsráðs Reykjavíkurborgar, Dóra Björt Guðjónsdóttir, var ekki lengi að andmæla áformunum opinberlega. Hún sagði ótækt að leggja fram slík áform utan vaxtarmarka og að húsnæðisuppbygging ætti að fara fram innan skilgreindra þéttbýlisreita. Hún sendi skýr skilaboð um það að Reykjavíkurborg myndi ekki fallast á beiðni um útvíkkun vaxtarmarka í þágu uppbyggingar að Gunnarshólma,“ skrifar Hildur í færslunni og bætir við:

„Ekki óvænt innlegg frá Píratanum knáa sem hefur verið í forsvari fyrir einstrengingslega nálgun á húsnæðisuppbygginu borgarinnar undanliðin ár.“

Samfylkingin hafi andmælt tilfærslum vaxtamarka

Hildur segir að það rími vel við afgreiðslu meirihlutans á tillögu Sjálfstæðismanna um útvíkkun vaxtarmarka borgarinnar. 

„Á haustdögum lögðum við til að borgarstjórn hæfi viðræður innan svæðisskipulagsnefndar höfuðborgarsvæðisins um tilfærslu vaxtarmarkanna svo hægt væri að skipuleggja mun stærra svæði undir húsnæðisuppbyggingu í Reykjavík, enda ekki vanþörf á. Það er skemmst frá því að segja að Samfylking varði miklu púðri í að andmæla hugmyndunum og meirihlutinn gat ekki fallist á tillöguna,“ skrifar hún einnig í færslunni.

Hún segir svo að Ragnar Þór Ingólfsson, frambjóðandi Flokks fólksins, hafi hitt naglann á höfuðið í gærdag þegar hann sagði rót verðbólguvandans liggja í húsnæðisskorti og að sá vandi yrði ekki leystur nema brotið yrði nýtt land og ráðist í stórfellda uppbyggingu húsnæðis hérlendis.

Ekki náðist í Pawel til að fá viðbrögð við hans við orðum Hildar.