Í tilkynningu frá Íslensku kvikmynda- og sjónvarpsakademíunni, ÍKSA, segir að dómnefnd á vegum akademíunnar hafi valið myndina sem framlag Íslands. Í henni hafi setið fulltrúar helstu fagfélaga íslenska kvikmyndaiðnaðarins, auk fulltrúa kvikmyndahúsa, gagnrýnenda og Kvikmyndamiðstöðvar Íslands.
Hrífandi saga um litlu augnablikin
Í umsögn dómnefndarinnar sagði meðal annars að Snerting væri í senn epísk og mannleg saga um tilfinningar, ást eftirsjá og litlu augnablikin í lífi hvers manns sem öðlist merkingu þegar horft væri til baka.
„Snerting er hrífandi saga um mennskuna, menningarheima sem skarast á og leitina að svörum við ósvöruðum spurningum. Atvik og örlög heillar mannsævi fléttuð saman í órofa heild,” segir þá í umsögninni.
Óskarsverðlaunahátíðin 2025 verður haldin 2. mars næstkomandi. Ferli kosninga Akademíunnar er þannig að stuttlistinn svokallaði verður kynntur 17. desember næstkomandi, en tilnefningar til verðlaunanna verða opinberaðar 17. janúar 2025. Því er ekki enn útséð með það hvort myndin hljóti tilnefningu til verðlaunanna.
Egill Ólafsson fer með aðalhlutverk í myndinni, en í maí síðastliðnum hitti Heimir Már Pétursson Egil og ræddi við hann um myndina, glímuna við Parkinson, ferilinn og fleira.
Snerting er byggð á samnefndri skáldsögu Ólafs Jóhanns Ólafssonar frá árinu 2021. Baltasar Kormákur leikstýrði myndinni og skrifaði handritið, ásamt Ólafi.
Hefur farið vítt og breitt
Aðalhlutverkið er líkt og áður sagði í höndum Egils Ólafssonar en auk hans fara þau Pálmi Kormákur, Sigurður Ingvarsson, María Ellingsen, Theodór Júlíusson, Starkaður Pétursson og Benedikt Erlingsson með hlutverk í myndinni. Japönsku leikararnir Koki, Yoko Narahashi, Masatoshi Nakamura, Meg Kubota og Eiji Mihara fara einnig með hlutverk í Snertingu.
Snerting segir frá Kristófer, sjötugum ekkli sem kominn er á eftirlaun. Hann leggur upp í ferðalag, þegar heimsfaraldurinn er skollinn á, í von um að finna skýringu á því hvað orðið hafi um kærustu hans sem hvarf sporlaust frá London 50 árum áður. För hans leiðir hann yfir hálfan hnöttinn og alla leið til Japans.
Myndin var frumsýnd hér á landi 29. maí síðastliðinn, en hefur einnig verið sýnd í kvikmyndahúsum í Þýskalandi, Ástralíu, Bretlandi, Írlandi, Singapúr og Ítalíu ásamt því að vera sýnd á kvikmyndahátíðum víða um heim, auk þess að hafa fengið góða dóma víða um heim. Hún verður frumsýnd enn víðar seinna á þessu ári og byrjun árs 2025.
