Fannst vand­ræða­legt að sjá KR fagna jöfnunarmarkinu

KR og KA gerðu 2-2 jafntefli í Bestu deild karla á mánudaginn. Finnur Tómas skoraði jöfnunarmark KR-inga í blálok leiksins.

Í Stúkunni var rætt um stöðu KR og Albert fannst fagnið hjá þeim gegn KA vera allt að því vandræðalegt.

„Ég veit ekki hvort ég hefði fagnað þessu marki. Ég hefði bara tekið boltann, haldið kjafti og bara eiginlega skammast mín,“ sagði Albert.

„Ég veit þeir jöfnuðu á heimavelli gegn KA en samt, mér fannst smá vandræðalegt fyrir stórveldi eins og KR, getur ekki einu sinni unnið þennan heimaleik, að vera fagna þessu marki eins og þeir séu að berjast um eitthvað svakalega hluti. Þeir eru bara í drullunni og þetta var enn ein slaka frammistaðan á heimavelli.“

KR hefur ekki unnið í níu leikjum í röð í heildina og átta í röð á heimavelli. Liðið er í 9. sæti Bestu deildarinnar með fimmtán stig.

Sjá má innslagið úr Stúkunni í spilaranum hér fyrir ofan.