Kostnaður ríkissjóðs vegna Grindavíkur um áttatíu milljarðar

Jón Ísak Ragnarsson skrifar 14. júní 2024 15:33

Áætlaður heildarkostnaður vegna stuðningsaðgerða við Grindavík árin 2023 og 2024 er um 80 milljarðar Stjórnarráðið

Áætlað er að kostnaður ríkissjóðs vegna fjölbreyttra stuðningsaðgerða við Grindavík í kjölfar jarðhræringa á Reykjanesskaga árin 2023 og 2024 nemi um áttatíu milljörðum króna. Fjármálaráðuneytið hefur tekið saman kostnað ríkisins sem fellur til vegna ýmissa stuðningsaðgerða við Grindavík. Þyngst vegu framlag ríkissjóðs vegna kaupa Þórkötlu á íbúðarhúsnæði í Grindavík.

Þetta kemur fram í tilkynningu stjórnarráðsins.

Þar segir að fjáraukalög fyrir árið 2023, fjárlög fyrir 2024 og þrenn fjáraukalög á yfirstandandi ári nemi um 22,5 milljörðum króna. Þar af sé um 8,2 milljarða millifærsla úr almennum varasjóði. Fjárveitingar vegna byggingar varnargarðs til varnar Grindavíkurbæ og orkuverinu í Svartsengi nemi um 7,2 milljörðum króna. Húsnæðisstuðningur við Grindvíkinga nemi tæpum 3 milljörðum.

Fjárheimildir vegna stuðningsaðgerða:


Stuðningur til launagreiðslna	9,2 ma.kr.
Sértækur húsnæðisstuðningur	2,7 ma.kr.
Rekstrarstuðningur	2,5 ma.kr.
Bygging varnargarða við Svartsengi og Grindavík	7,2 ma.kr.
Aðrar fjárveitingar	0,9 ma.kr.
Samtals	22,5 ma.kr.

Áætlað er að veita þurfi frekara fjármagn vegna stöðunnar á Reykjanesskaga, ekki síst til Almannavarna og Vegagerðarinnar.

Tafla yfir kostnað sem sýnir helstu aðgerðir og fjárheimildir


Almannavarnir	4,5 ma.kr.
Vegagerðin	0,6 ma.kr.
Annað	0,5 ma.kr.
Samtals	5,6 ma.kr.

Um fimmtíu milljarðar í húsnæðisuppkaup

Við þetta bætist svo framlag ríkissjóðs vegna kaupa Þórkötlu á íbúðarhúsnæði í Grindavík, en kostnaðurinn við uppkaupin hljóðar upp á 51,5 milljarða. Alls er því áætlaður stuðningur ríkissjóðs við Grindavík árin 2023 og 2024 um 80 milljarðar króna.

Þá segir að frekari útgjöld vegna jarðhræringanna gætu fallið til síðar eftir því hvernig mál þróast.

Grindavík Eldgos á Reykjanesskaga Efnahagsmál

Mest lesið

Fleiri fréttir