Drög að sátt lögð fyrir ríkis­stjórn á næstu dögum

Stíft hefur verið fundað milli Starfsgreinasambandsins, Samiðnar og Eflingar með um áttatíu þúsund félagsmenn á bakvið sig annars vegar og Samtaka atvinnulífsins hins vegar um helgina og í dag. Samkvæmt heimildum fréttastofu liggja samningar nánast fyrir hvað varðar launaliðinn og forsenduákvæði samninga um þróun verðbólgu.

Þannig verði samningar uppsegjanlegir ef ákveðnum verðbólgumarkmiðum verði ekki náð í október á næsta ári og í október 2026. Samningar gildi almennt til ársins 2028 eða í fjögur ár.

Það hefur flækt stöðuna að VR og Landssamband verslunarmanna sögðu sig frá breiðfylkingunni á föstudag vegna óánægju með forsenduákvæði varðandi vexti. Þrátt fyrir þetta er stefnt að því að um eða upp úr miðri þessari viku verði hægt að kynna fyrir ríkisstjórn allsherjar samkomulag á vinnumarkaði. Á móti muni ríkisstjórnin gera grein fyrir hvað hún er tilbúin að gera til að tryggja frið á vinnumarkaði næstu fjögur árin.

Fagfélögin á almenna vinnumarkaðnum og bandalög opinberra starfsmanna bíða einnig á hliðarlínunni með að ljúka sínum málum. Á þessu stigi kjaraviðræðna þegar allar meginlínur liggja fyrir, fer töluverður tími í að útfæra einstök samningsatriði við ólíka hópa. Þeir bjartsýnustu sem fréttastofa hefur rætt við segja að þetta ætti að geta tekist á næstu dögum.

Samningsaðilar eru í daglegum samskiptum við stjórnvöld þannig að fátt ætti að koma á óvart þegar pakkinn verður kynntur fyrir þeim. Ef allt gengur upp gæti farið svo að meginlínur um sátt í kjaramálum þjóðarinnar næstu fjögur árin liggi fyrir áður en vikan er úti.

„Fín gjöf til íslensku þjóðarinnar“

Sólveig Anna Jónsdóttir, formaður Eflingar, sagði viðræður hafa gengið nokkuð vel að loknum fundi um klukkan hálf sjö í kvöld.

„Ég tel að ef við höldum áfram að vinna vel, þá ættum við að geta klárað, mögulega, hér í vikulok.“

Vilhjálmur Birgisson, formaður Starfsgreinasambands Íslands, telur að viðræður muni klárast fyrir vikulok. Þær hafi gangið vel undanfarna daga. Hann sagði að á næstu dögum fengi verkalýðshreyfingin kynningu á því hvernig stjórnvöld muni koma að kjarasamningum. Það muni skipta miklu máli.

„Ávinningurinn af því, ef þetta allt tekst, að við náum hér niður verðbólgu, að við náum niður vöxtum og fáum góðan aðgerðapakka frá stjórnvöldum. Þá held ég að þetta sé bara fín gjöf til íslensku þjóðarinnar. Ef þetta tekst,“ sagði Vilhjálmur.

Þessi „pakki“ mun gilda fyrir allan vinnumarkaðinn.

Vilhjálmur sagði að það myndi ekki koma honum á óvart ef viðræður myndu klárast í lok þessarar viku, hjá þeim félögum sem hafa verið lengst í viðræðum. Önnur félög væru einnig komin á skrið.

„Það er margt búið að gerast hér í dag.“

Hann segir það ekki hafa  flækt stöðuna að VR og Landssambandi íslenzkra verzlunarmanna slitu sig frá breiðfylkingunni svokölluðu.

„Við höfum bara haldið áfram hér með okkar vinnu. Við erum einbeitt í því að láta þetta verkefni ganga upp. Við erum búin að undirrita launaliðinn. Við erum búin að undirrita forsenduákvæðin. Síðan er þetta bara handavinna sem verið er að vinna í núna.“

Vilhjálmur vildi ekki ganga svo langt að segja að samningar væru í höfn. Hann væri búinn að vera svo lengi í þessum bransa að hann vissi að þetta væri aldrei búið fyrr en búið sé að skrifa undir.