Hissa á á­kvörðun Hamilton

Snemma í gær fóru að berast sögusagnir um það að Hamilton ætlaði sér að virkja ákvæði í samningi sínum við Mercedes og yfirgefa liðið til að skipta yfir til Ferrari eftir næsta tímabil. Í gærkvöldi fengust sögusagnirnar svo staðfestar og komandi tímabil verður síðasta tímabil Hamilton hjá Mercedes.

Hamilton, sem hefur ekið fyrir Mercedes undanfarin ellefu ár, greindi Wolff frá ákvörðun sinni síðastliðinn miðvikudag. Wolff segist hafa verið hissa á ákvörðuninni, en að hann væri ekki fúll út í Hamilton og að hann hafi ekki reynt að fá sjöfalda heimsmeistarann til að skipta um skoðun.

„Honum leið eins og hann þyrfti að breyta til og ég get skilið það,“ sagði Wolff.

„Við höfum náð ótrúlegum árangri saman. Við vorum sammála um að hann myndi skrifa undir stuttan samning á sinum tíma og að önnur tækifæri gætu boðist, bæði fyrir hann og fyrir okkur.“

„Það gæti verið að hann hafi getað skrifað undir lengri samning hjá Ferrari og að hann ætli að láta virkilega á þetta reyna undir lok ferilsins,“ bættu Wolff við um hinn 39 ára gamla Hamilton.

„Við erum búnir að ganga í gegnum magnað ferðalag saman. Ferðalag sem löngu er komið í sögubækurnar. Við viljum enda þetta á jákvæðum nótum, en við munum byggja í átt að nýju, árangursríku tímabili.“