Maho­mes örugg­lega á­fram og hinn ungi C.J. Stroud sló met

Fyrri leikur kvöldsins var viðureign Houston Texans og Cleveland Browns. Sóknarleikur beggja liða gekk vel í upphafi og voru bæði lið búin að skora tvö snertimörk áður en annar leikhluti var hálfnaður.

C.J. Stroud var að spila mjög vel fyrir Texans en þessi nýliði hefur átt frábært tímabil í leikstjórnendastöðu liðsins. Staðan í hálfleik var 24-14 fyrir heimamenn sem voru með yfirhöndina.

Heimamenn gengu svo frá leiknum í þriðja leikhluta. Þeir bættu við tveimur snertimörkum og staðan orðin 38-14 Texans í vil. Þeir bættu við í fjórða leikhlutanum og unnu að lokum 45-14 sigur, heldur betur yfirlýsing frá C.J. Stroud og félögum sem fara áfram í næstu umferð úrslitakeppninnar í fyrsta sinn síðan árið 2019.

Með sigrinum varð C.J. Stroud yngsti leikstjórnandinn til að vinna leik í úrslitakeppni og það gerði hann með stæl. 

Síðari leikur kvöldsins fór fram í fimbulkulda í Kansas. Miami Dolphins var þar í heimsókn hjá Kansas City Chiefs en samkvæmt forráðamönnum NFL var um að ræða fjórða kaldasta leik í sögu deildarinnar. Átján stiga frost var þegar leikurinn fór fram.

Lið Chiefs byrjaði vel og strax í fyrstu sókn kastaði Patrick Mahomes til Rashee Rice sem hljóp með boltann inn í endamarkið af stuttu færi. Frábær fyrsta sókn og stuðningsmenn Chiefs á Arrowhead vellinum kættust mjög.

Dolphins gekk illa að fóta sig á svellinu í byrjun og átti Tua Tagovailoa meðal annars sendingu undir lok fyrsta leikhluta sem rataði beint í hendur varnarmanns Chiefs. Dolphins óx hins vegar ásmegin og jafnaði metin strax í upphafi annars leikhluta. Tagovailoa átti þá langa sendingu sem náði alla leið á Tyreek Hill. Hill gerði frábærlega í að losa sig við varnarmenn Chiefs og hljóp í endamarkið.

Chiefs fékk tækifæri til að skora annað snertimark en fékk dæmt á sig víti eftir að Rice hafði hlaupið í endamarkið í annað sinn. Þeir þurftu að sætta sig við vallarmark og staðan orðin 13-7. Sparkarinn Harrison Butker bætti við öðru vallarmarki undir lok annars leikhluta og staðan 16-7.

Dolphins voru í vandræðum sóknarlega í fyrri hálfleiknum og það lagaðist ekki í þeim síðari. Chiefs vörnin malaði sókn gestanna hægt og hægt sem náði ekki að bæta við fleiri stigum. Lið Chiefs sigldi sigrinum hægt og rólega í höfn og vann að lokum 27-7 og er því komið áfram í næstu umferð og stuðningsmenn Chiefs með Taylor Swift í broddi fylkingar fögnuðu vel.

Þar sem leik Buffalo Bills og Pittsburgh Steelers var frestað til mánudags fara aðeins tveir leikir fram í kvöld. Dallas Cowboys tekur á móti Green Bay Packers klukkan 21:30 tekur lið Detroit Lions á móti LA Rams. Báðir leikirnir verða í beinni útsendingu á Stöð 2 Sport 2.