Fékk rangar upp­lýsingar og strandaði fjóra metra frá bryggju

Þetta er niðurstaða rannsóknarnefnar samgönguslysa sem birti skýrslu sína í gær um strand skipsins í Ólafsvík þann 26. mars síðastliðinn.

Skipið strandaði um fjórum metrum frá bryggjunni en ljóst má vera að skipstjóri hafi fengið rangar upplýsingar frá hafnarstarfsmönnum um dýptina í höfninni sem hafi ekki verið í samræmi við rafræn sjókort skipsins. Telur nefndin að miðað við djúpristu skipsins hefði átt að láta skipið bíða þar til sjávarstaða hækkaði.

Var að fara að losa saltfarm

Skipið var að sigla inn í Ólafsvíkurhöfn þar sem losa átti saltfarm úr skipinu. Um klukkan 15:40 umræddan dag, tók það niðri og stöðvaðist þegar skipið átti eftir um fjóra metra í bryggjuna. Skipverjar komu upp endum en skipið losnaði einum og hálfum tíma síðar.

Við rannsókn kom fram að upphaflega hafi staðið til að skipið myndi losa hluta af farminum í Þorlákshöfn en það breyttist og því varð Ólafsvík fyrsta höfn skipsins. Á leið til Ólafsvíkur hafði skipstjóri Wilson Hook samband við umboðsmann skipsins og upplýsti um djúpristu þess, sem sé 5,2 metrar að framan og 5,8 metrar að aftan.

Óskaði eftir hafnsögumanni

Skipstjórinn lét bæði umboðsmann skipsins og hafnarvörð í Ólafsvíkurhöfn vita að hann hefði efasemdir um að nægilegt dýpi væri í höfninni og fengust þá þær upplýsingar að dýpið væri um sjö metrar. Óskaði skipstjóri eftir hafnsögumanni sem var ekki í boði og var honum tjáð að björgunarskip myndi leiðbeina skipinu að bryggju sem lauk svo með að skipið tók niðri.

Þegar kafað var niður að skipinu voru sjáanlegar rispur á málningu.

Wilson Hook er um níutíu metra langt, smíðað árið 2004 og siglir undir norskum fána. Skipverjar voru níu þegar skipið strandaði í Ólafsvík.