Ráðherrar og herforingjar sagðir deila um innrás

Samkvæmt heimildum New York Times innan ísraelska hersins og stjórnkerfis landsins, hafa þeir sem vilja bíða meðal annars áhyggjur af því að herinn myndi dragast inn í langvarandi og mannskæð átök við Hamas-liða og að Ísraelar myndu einnig lenda í átökum við Hezbollah í Líbanon.

Hezbollah-samtökin eru talin töluvert öflugri en Hamas. Í þeim eru vígamenn sem hafa langa reynslu af átökum í Írak og Sýrlandi og eru samtökin talin eiga þúsundir eldflauga sem skotið yrði að borgum Ísraels. Hamas hafa skotið hundruðum eldflauga á Ísrael á undanförnum vikum en þeim myndi líklega fjölga mjög með innkomu Hezbolla í stríðið.

Einnig er deilt um það hve umfangsmikil innrásin ætti að vera og hvort betra væri að gera nokkrar smáar í stað einnar stórrar. Þá vita ráðamenn ekki hverjir ættu að taka við stjórn Gasastrandarinnar ef Ísraelar hernema svæðið.

Eftir mannskæða árás Hamas-liða á Ísrael þann 7. október lýstu Ísraelar því yfir að gert yrði útaf við Hamas-samtökin. Síðan þá hafa Ísraelar gert linnulausar loft- og stórskotaliðsárásir á Gasaströndina og hafa einni gert stutt áhlaup á jörðu niðri.

Þúsundir Palestínumanna eru sagðir liggja í valnum eftir árásirnar.

Sjá einnig: Segja þrjú þúsund börn látin

Innrás á Gasaströndina myndi hafa hörmulegar afleiðingar fyrir íbúa þar, leiða til mun meira eignatjóns en hingað hefur sést og líklega myndu margir ísraelskir hermenn og Hamas-liðar verða felldir í átökum.

Ísraelar yrðu í sérstökum vandræðum vegna umfangsmikilla neðanjarðargangna sem Hamas-liðar hafa grafið undir Gasaströndinni.

Háttsettur þingmaður úr Likud-flokknum, flokki Benjamíns Netanjahú, forsætisráðherra, segir ríkisstjórnina skipaða mönnum með mismunandi skoðanir. Sumir haldi því fram að innrásin verði að hefjast og hægt sé að hugsa um næstu skref seinna.

Danny Danon, áðurnefndur þingmaður sem situr í bæði utanríkismálanefnd og varnarmálanefnd þingsins, segir að markmiðin verði að vera skýr að hans mati. Þau verði að liggja fyrir áður en innrásin hefst.

NYT segir forsvarsmenn hersins þegar hafa samið innrásaráætlun en Netanjahú hafi neitað að samþykkja hana, meðal annars vegna þess að hann vilji að meðlimir stríðsráðs sem hann myndaði eftir árásina 7. október, verði sammála um áætlunina. Þetta ku hafa reitt forsvarsmenn hersins til reiði.

Greinendur sem rætt var við segja Netanjahú óttast að verða kennt um misheppnaða og langvarandi innrás á Gasaströndina, sérstaklega þar sem vinsældir hans hafa þegar minnkað til muna.

Ísraelski miðillinn Haaretz birti í morgun niðurstöður könnunar sem bendir til að nærri því helmingur ísraelsku þjóðarinnar sé hlynntur því að bíða með innrásina. Fjórðungur vill hún verði gerð hið snarasta.

Leggja mismikla áherslu á frelsu gísla

Netanjahú hét því á miðvikudaginn að á sama tíma og kapp yrði lagt á að gera útaf við Hamas-samtökin yrði einnig reynt að frelsa alla gíslana í haldi samtakanna. Yoav Gallant, varnarmálaráðherra, nefndi það ekki í ræðu sem hann hélt degi síðar.

Netanjahú og aðrir í ríkisstjórn hans hafa deilt mjög við herinn á undanförnum mánuðum. Það má að miklu leyti rekja til þeirra breytinga sem Netanjahú ætlaði að gera á dómskerfi Ísraels. Það leiddi til þess að fjölmargir í varaliði Ísraels neituðu að mæta til vinnu.

Þessar deilur hafa, samkvæmt heimildarmönnum NYT, leitt til þess að forsvarsmönnum hersins hefur verið bannað að taka upptökutæki með sér á ríkisstjórnarfundi. Herforingjarnir telja það vera tilraun til að takmarka möguleg sönnunargögn í væntanlegri rannsókn á því hvernig Hamas-liðar gátu ráðist á tuttugu bæi og herstöðvar í Ísrael og viðbrögðunum við árásinni.