Skilnaður einn hættulegasti tímapunkturinn

Á evrópskri ráðstefnu um heimilisofbeldi hér á landi mun Ragna Björg Guðbrandsdóttir sérfræðingur hjá Sýslumanni, fjalla um það hættuástand sem getur skapast þegar þolandi ákveður að skilja því það sé sá tímapunktur sem ofbeldismaður finni að hann sé að missa tökin.

„Það getur oft verið mjög hættulegt og orðið stigmögnun á ofbeldinu. Það getur lýst sér í eltihrellahegðun þar sem verið er að sitja fyrir fólki, þar sem verið er að njósna um það. Þar sem er verið að hræða fólk og mikið er um hótanir,“ segir Ragna Björg Guðbrandsdóttir, sérfræðingur hjá Sýslumanninum á höfuðborgarsvæðinu.

Það sé fyrir öllu fagaðilar séu meðvitaðir og að þolendur heimilisofbeldis fái viðeigandi undirbúning og fræðslu um leiðir til að tryggja eigið öryggi við skilnað. Hún segir að ofbeldismenn notfæri sér í auknum mæli tæknina til að sitja um fyrir og kúga. Þrátt fyrir að búið sé að útiloka þá frá öllum samfélagsmiðlum þá finni þeir leiðir til að hrella.

„Eins og millifærslur á bankareikningi, þeir setja inn lítinn pening, tíu krónur, og setja skilaboð með: „Farðu og dreptu þig“ eða „þú ert hóra,“ og eitthvað slíkt.“

Tæknin færi ofbeldið á annað stig

Fræðslustýra hjá Kvennaathvarfinu segir tæknina færa ofbeldið á annað stig, þeir noti gjarnan búnað til að rekja ferðir, til dæmis á bifreið.

„Það eru dæmi um að konur hafa verið: „Ég veit ég er að hljóma eins og ég sé ímyndunarveik en hann er að fylgjast með mér,“ en svo hefur bara komið í ljós myndavél sem var falin inn á heimilinu hennar,“ segir Ísól Björk Karlsdóttir, fræðslustýra Kvennaathvarfsins.

Sterar og örvandi efni algeng

Varahéraðssaksóknari segir að á síðustu árum og áratugum hafi þessi mál orðið grimmari.

„Við erum með dæmi um að menn eru ákærðir fyrir tilraun til manndráps eða aðferðir sem eru notaðar sem eru taldar sérstaklega hættulegar, þá er ég að tala um kyrkingatak eða viðkomandi er að stappa jafnvel á líkama sem veldur miklum rifbrotum og jafnvel innvortis blæðingum. Við erum farin að sjá mikið af ljótum málum,“ segir Kolbrún Benediktsdóttir, varahéraðssaksóknari.

En á þessum ljótu málum sé gjarnan samnefnari.

„Það er svo algengt og það eru vísbendingar um það, jafnvel liggur fyrir að þeir sem eru að beita ofbeldi í nánum samböndum nota annað hvort örvandi efni eða stera. Eða bæði.“