Hlakkaði í Margréti að heyra: „Hún fékk starfið út af því að hún er kona“

Margrét var ráðin í ársbyrjun 2022 og segist hafa heyrt fólk telja að hún hefði aðeins fengið starfið vegna þess að hún væri kona. Hún segir að lítil reynsla hennar af meistaraflokksþjálfun geti hafa ýtt undir þessar raddir en Margrét hefur samt þjálfað frá árinu 2006, eða í sautján ár, og verið sigursæll yngri flokka þjálfari, yfirþjálfari yngri flokka og svo aðstoðarþjálfari í meistaraflokki.

Tíminn með U19-landsliðið hófst þó erfiðlega og Ísland tapaði fyrstu fjórum leikjum sínum undir stjórn Margrétar, þremur í milliriðli fyrir EM, gegn Englandi, Wales og Belgíu, og vináttulandsleik gegn Noregi.

Síðan þá hefur Ísland hins vegar spilað tíu leiki í röð án taps, unnið níu þeirra, og tryggt sig inn í lokakeppni EM þar sem aðeins átta bestu þjóðir álfunnar fá að spila, í Belgíu 18.-30. júlí.

„Þetta er búinn að vera ótrúlegur tími,“ segir Margrét í ítarlegu viðtali við Mist Rúnarsdóttur í hlaðvarpsþætti Heimavallarsins.

„Ótrúlega góður skóli“

„Eftir það sem gekk á, þegar ég var nýkomin í starfið og við fórum til Englands, og fengum skell í hverjum einasta leik, tími þar sem maður þurfti mikið að leita inn á við til að tækla það mótlæti, og að þetta sé svo niðurstaðan, að við séum komin inn í lokakeppni, það er ótrúlega góð tilfinning,“ segir Margrét. 

Eins og fyrr segir varð hún vör við efasemdir um að hún ætti að fá starfið á sínum tíma.

„Það hlakkaði alltaf mjög mikið í mér þegar ég heyrði út undan mér: „Hún fékk starfið út af því að hún er kona.“ Að það væri kominn tími til að ráða konu. Það hlakkaði mikið í mér og það var skellur að fara í fyrsta verkefni og upplifa þetta svona ískalt. Eftir á að hyggja var þetta ótrúlega góður skóli að fara í gegnum.

Ég held að það sé alveg eðlilegt þegar maður upplifir svona mótmæli að það komi efasemdir að vissu marki. Þá þarftu kannski að finna aðra leið – þetta gekk vel en þetta gekk ekki vel – og þú ferð djúpt í þína hugmyndafræði. Svo kemstu á einhvern stað þar sem þú veist að þetta er þín leið, þín nálgun, og að þetta sé það sem þú vilt standa fyrir.“

Kemst í besta gírinn þegar einhver efast

Margrét sýnir því vissan skilning að einhverjir hafi efast um að hún ætti skilið að taka við U19-landsliðinu:

„Þetta er kannski svona þegar þú ert ekki búin að sanna þig á neinu sviði sem meistaraflokksþjálfari. Ég hef ekki gert það þannig séð. Ég var í Val þegar liðið var upp á sitt besta, ekki í lykilhlutverki heldur á bekknum, og fer svo að hluta til inn með Pétri [Péturssyni] í fyrsta árið hans. Ég treð mér eiginlega í það sjálf, því mig langaði að segja Pétri hvernig hlutirnir voru þegar allt var í blóma hjá Val. Ég var með honum fyrsta árið, varð svo ólétt og fór svo í Fylki með Kjartani [Stefánssyni]. Ég var ekki aðalþjálfari en fékk frelsi til að gera hlutina eins og ég trúði á þá. Það er eina meistaraflokksreynsla mín,“ segir Margrét.

Sjálfsagt efast fáir um það í dag, ef nokkrir, að Margrét hafi verið rétti kosturinn í starfið en það hefði þó ekki neikvæð áhrif á hana:

„Þetta gefur mér kraft. Sérstaklega þegar það eru einhverjar efasemdir. Þá kemst ég í besta gírinn. Ég hef gaman af þessu,“ segir Margrét en allt viðtalið við hana á Heimavellinum má heyra á hlaðvarpsveitum.