Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.
Hvað finnst þér skemmtilegast við tískuna?
Mér finnst skemmtilegt hvað hún skapar mikið samfélag. Ég hef eignast svo marga vini út frá henni og tískan er fasti í mínu lífi sem getur alltaf glatt mig, sama hvað.
Tískan er líka svo merkileg og ómerkileg á sama tíma. Fatnaður og trend geta sagt mikið um sveiflur í pólitísku umhverfi og menningarlífi, tíska er stór þáttur í hámenningu, sömuleiðis lágmenningu og gerir okkur kleift að skyggnast til dæmis inn í heim elítunnar, teknóklúbba, trúarsamtaka, þjóðflokka og LGBTQ-hreyfingarinnar.
En síðan í lok dags er fatnaður líka bara rassagardínur. Öll þurfum við nú að klæðast einhverju og þannig getur tískan líka verið yndislega ómerkileg.
Hver er uppáhalds flíkin þín og af hverju?
Eins ómerkilegt og það er þá hugsa ég að ullarkápan mín sé uppáhalds flíkin. Ég fékk hana í Hertex á þúsund kall og að sjálfsögðu er hún milljón númerum of stór.
Hún er með axlapúðum sem standa langt fram yfir mínar eigin og gefur mér þetta androgynous útlit sem ég sækist svo oft í. Hún hefur Rick Owens on a budget blæ yfir sér.
Eyðirðu miklum tíma í að velja föt hverju sinni?
Ég er alltaf orðin of sein þegar það kemur að því að velja föt, þannig ég get aldrei eytt miklum tíma í það.
Ég pæli miklu meira í silhouettes og efnasamsetningunni, frekar en flíkunum sjálfum. Síðan veit ég ekki neitt og geri bara eitthvað þangað til að mér finnst það virka.
Hvernig myndirðu lýsa stílnum þínum?
Þó ég endi alltaf þá því að líta frekar kvenlega út, sækist ég alltaf í að blanda karllægari flíkum við hyper-kvenlegar flíkur.
Það er mikið um korselett ofan á skyrtu og bindi eða alltof stóra jakka ofan á blússur.
Ég er mikil layering kona og hugsa í lögum þegar kemur að fatnaði, því fleiri lög því skemmtilegra.
Hefur stíllinn þinn breyst mikið í gegnum tíðina og hvernig þá?
Sko, mér þykir ég merkilega samkvæm sjálfri mér í gegnum tíðina. Ég hef þó nýlega sleppt af mér því beisli að þurfa að vera í einum stíl.
Mér þykir þetta tal um fagurfræði og hvort maður sé með „scandi chic aesthetic“ eða „bohemian coquette“ og þar fram eftir götunum vera svo hamlandi. Við erum einstaklingar, ekki risa tískuhús með heilt vörumerki og markaðsteymi. Leyfðu þér að prófa alls konar í einu.
Ég hef þróast svo afskaplega mikið, bara á síðustu árunum, með því að leyfa mér að prófa alls konar skrítið. Margt alveg hrikalegt, en ég gef mér samt það rými.
Hvaðan sækirðu innblástur í tískunni?
Ég sæki mikinn innblástur í allskonar sub-kúltúra, eins rave senuna, dragdrottningar og nornir.
En svo kemur langmesti innblásturinn frá vinkonum mínum og vinum, æðislega hæfileikaríku fólki.
Ertu með einhver boð og bönn þegar það kemur að klæðaburði?
Í rauninni ekki, það er ekki mitt að segja. Það er svo margt hæfileikaríkt fólk sem býr til snilld út fáránlegustu pælingum.
Svo finnst mér ekki hægt að hata á look sem er tjáning einstaklings. Það aðdáunarverðasta og mest aðlaðandi sem man gerir er að reyna. Svo lengi sem þið eruð spennt fyrir lookinu, lögðuð hugsun í það og berið ykkur vel er ég strax hrifin. Hotness is a mindset.
Hver er eftirminnilegasta flík sem þú hefur klæðst og af hverju?
Klárlega allar flíkurnar sem ég fékk að klæðast í Rick Owens heiðursmyndatöku fyrir Vogue Arabia, ásamt Hönnu Rakel.
Það var svo ruglað að sjá þessar flíkur fyrir framan þig, hvað þá fara í þær.
Svona allra eftirminnilegasta var kannski pallíettukjólinn.
Ég klæddi mig í hann níðþröngan, settist svo upp í bíl, við keyrðum að eldgosinu og þar tók við gangan. Ég gat bara tekið hálft skref í kjólnum og kjagaði þarna upp hæðina. Þetta var alveg sturluð taka.
Býrðu yfir einhverju góðu ráði þegar það kemur að tísku?
Bara prófið eitthvað flippað.
Föt eru kynlaus og verkefnalaus, bókstaflega efnisbútar sem má raða á alla vegu.
Hér má fylgjast með Karítas Lottu á Instagram.
