„Þau öskruðu nafnið mitt og ég skilaði mínu“

„Já ég er ekkert eðlilega ánægður, kom inn af bekknum, skoraði og fagnaði fyrir framan áhorfendurnar en tilfinningin var geggjuð.“

Óskar fékk boltann úti á kanti vinstra meginn, keyrði inn á teiginn og kláraði með þéttingsföstu skoti niður í hægra hornið.

„Þegar ég sá boltann í netinu, hugsaði ég bara, vá ég er að fara að hlaupa í áttina að stúkunni og þetta var ólýsanleg tilfinning, besta tilfinning í heimi.“

Ungir áhorfendur Fylkis kölluðu mikið eftir því að fá Óskar inn á völlinn. Rúnar Páll Sigmundsson, þjálfari hans, var greinilega að hlusta því skömmu síðar var Óskar kominn inn á. 

„Ég hef verið að þjálfa eitthvað af þessum krökkum og vinna í Árbæjarskóla. Þau öskruðu bara nafnið mitt og ég skilaði mínu, skoraði og við unnum leikinn,“ sagði Óskar glaður í bragði.

Hinn elgtanaði byrjaði fyrstu tvo leiki tímabilsins en var á bekknum í kvöld. Aðspurður um liðsval og hvernig hann eigi að koma sér í byrjunarliðið var Óskar hógvær.

„Hann ræður því, ég ætla ekki að ráða byrjunarliðinu en ég í reyni bara að gera mitt besta á vellinum og hann ræður liðinu. Ég þarf að halda áfram að leggja á mig fram á æfingum og vera geggjaður í leikjum.“