Fótbolti

Arnar Þór rekinn

Ingvi Þór Sæmundsson skrifar
Arnar Þór Viðarsson stýrði íslenska landsliðinu í síðasta sinn í 0-7 sigri á Liechtenstein á sunnudaginn.
Arnar Þór Viðarsson stýrði íslenska landsliðinu í síðasta sinn í 0-7 sigri á Liechtenstein á sunnudaginn. getty/Alex Nicodim

Stjórn KSÍ hefur rekið Arnar Þór Viðarsson úr starfi þjálfara íslenska karlalandsliðsins í fótbolta.

Greint er frá þessu á heimasíðu KSÍ. Þar segir að stjórn KSÍ hafi metið þetta sem nauðsynlegt skref með hagsmuni liðsins í huga og til að koma því aftur í fremstu röð.

„Þetta er auðvitað erfið ákvörðun en við teljum hana nauðsynlega og rétta með hagsmuni liðsins að leiðarljósi. Arnar hefur gert margt gott hérna hjá KSÍ og á hrós skilið fyrir sitt starf sem var oft unnið í krefjandi aðstæðum. Nú förum við beint í að finna eftirmann hans til þess að hefja undirbúning fyrir næstu leiki liðsins sem fram fara í sumar,“ segir Vanda Sigurgeirsdóttir, formaður KSÍ.

Arnar stýrði íslenska landsliðinu í síðasta sinn í tveimur leikjum í undankeppni EM 2024 fyrr í þessum mánuði. Ísland tapaði fyrri leiknum fyrir Bosníu, 3-0, en vann svo Liechtenstein með sjö mörkum gegn engu.

Arnar var ráðinn þjálfari íslenska landsliðsins í lok árs 2020. Hann stýrði því í 31 leik. Sex þeirra unnust, þrettán enduðu með jafntefli og tólf töpuðust. Sigurhlutfallið var 19,4 prósent. Áður en Arnar var ráðinn landsliðsþjálfari stýrði hann U-21 árs landsliðinu og kom því meðal annars á lokamót EM.


Tengdar fréttir

Hver á að taka við landsliðinu?

Stjórn KSÍ stendur nú frammi fyrir því verkefni að ráða nýjan þjálfara fyrir karlalandsliðið í fótbolta eftir að Arnar Þór Viðarsson var rekinn í dag. En hvaða þjálfarar koma til greina?




Fleiri fréttir

Sjá meira


×