Lífið

Marsspá Siggu Kling - Bogmaðurinn

Sigga Kling skrifar

Elsku Bogmaðurinn minn, láttu ekki villa þér sýn, láttu ekki aðra sannfæra þig um að líf þitt sé verra en þú sérð það. Sú setning sem þú skalt nota er: Þetta reddast. Hafðu það hugfast. Þú ert skemmtilegur, þú elskar frelsi og ert forvitinn. Þú þarft alltaf að þroska og þróa þig til þess að þér finnist veröldin spennandi. Þú heillast af lífinu og öllum þáttum innan þess, láttu nú ekki aukakíló eða grátt hár pirra þig. Því eins og þú ert sterkur og duglegur, þá geta tilgangslausar áhyggjur eyðilagt fyrir þér gleðina.

  • Bogmaðurinn er frá 22. nóvember til 21. desember.

Þessi tími gefur þér að þú verður svo spenntur fyrir nýjungum og þarft alla vega að hafa möguleikana til þess að geta breytt einhverju. Þú gefst ekki upp fyrr en þú hefur náð í það sem þig vantar. Þessi þrautseigja þín hjálpar líka öðrum að ná takmarki sínu. Þú ert svo rausnarlegur og gjafmildur að fólk langar til að gefa þér tilbaka, svo taktu við öllum gjöfunum, hvort sem það er í orði eða verki.

Finndu leiðir til að tjá þig því enginn raðar orðunum eins vel og þú. Og hleyptu inn fólki sem er ólíkt þér, því þá sérðu virkilega hvaða mann þú hefur að geyma. Til dæmis getur þú alveg sagt hvernig vinur þinn er og hvaða karakter hann hefur að geyma, en svo horfirðu á höndina á sjálfum þér og hugsar: Hver er ég? Og í því er tilgangurinn fólginn að finna út hver þú ert og hvert þú vilt fara í þessu lífi sem þú valdir þér hér á Jörðinni.

Þú ert fæddur til þess að hafa gaman og læra og lifa til fullnustu, nýttu tímann þinn vel í marsmánuði, þá sérðu betur vel hvað þú vilt. Þú átt það til að vera heltekinn af manneskju eða verkefni sem er ekki þitt, því að þrjóskan þín er óendanleg. Í kringum 24. mars breytist lífsorkan þín og þá tekurðu virkilega þátt í veislu lífsins.

Knús og kossar, Sigga Kling






Fleiri fréttir

Sjá meira


×