Marsspá Siggu Kling - Sporðdrekinn

Þú þarft nefnilega líka að tala sjálfan þig til og tala þig upp úr pollinum. Þú hlustar mest á þína eigin rödd, en hér eru skilaboðin: Það eru svo margir í þessu merki að ná þeim árangri sem þeir hafa verið að bíða eftir. En það þýðir ekki bara að bíða, heldur skaltu stökkva á það sem þú vilt að gerist og ryðjast áfram eins og það sé snjóflóð á eftir þér. Þá færðu öll þau hjálpartæki til þess að sjá þetta verk blessast.

Það er mikill titringur í marsmánuði og svo mikil spenna að maður getur jafnvel heyrt hvað stresstíðnin er mikil. Þetta gefur þér samt tækifæri til þess að fá þínu framgengt, það getur vel verið að þú pirrist eða angrir einhvern með því að sýna hvað þú ert sterkur en það er bara ekki hægt í lífinu að hafa alla góða.

Rifrildi innan fjölskyldunnar er ekki eitthvað sem þú átt að taka þátt í. Ekki halda með neinum heldur vertu boðberi friðar. Þetta getur líka tengst inn í vináttu, því það kallast líka fjölskylda á mínu máli. Í dag þegar að stjörnuspáin kemur út er mjög merkilegur dagur: 03.03.23. Hann táknar nýtt upphaf og nýja möguleika fyrir þig. Og á fulla tunglinu sem er þann sjöunda mars skaltu vera kominn með það í hjarta þitt að sá dagur gefur ástina, hvað svo sem þú elskar.

Ef þú ert á lausu þá eru allir möguleikar opnir fyrir þig og þetta er líka tímabilið sem þú slítur vont samband ef þú ert í því. Þér finnst að þú strandir á fjárhagslegum áhyggjum. Þú hefur áður bjargað þér úr verri hlutum, en núna er heppinn og lukkan með þér - eins og ef þú værir í framboði yrðir þú sannarlega kosinn á þing.

Knús og kossar, Sigga Kling