Lífið

Ingó Veðurguð gefur út nýtt lag: „Situr einn í dimmu húsi, enginn honum hjá“

Sylvía Rut Sigfúsdóttir skrifar
Ingólfur Þórarinsson, betur þekktur sem Ingó Veðurguð.
Ingólfur Þórarinsson, betur þekktur sem Ingó Veðurguð. Vísir/Vilhelm

„Eins og flestir sem mig þekkja elska ég fátt meira en að búa til tónlist og hvað þá að koma fram og flytja hana,“ segir tónlistarmaðurinn Ingólfur Þórarsinsson, betur þekktur sem Ingó veðurguð, sem í dag gaf út nýtt lag.

„Síðustu tvö ár hafa verið lærdómsrík og héldu margir að ég hafi einfaldlega hætt í tónlist og sett gítarinn upp í hillu. Ég hef haft tíma til að spá í tónlist og mig langaði að gefa frá mér lag sem ég er ákaflega stoltur af. Ég hef alltaf komið til dyranna eins og ég er klæddur hvað varðar texta í lögunum mínum og í þessu er engin breyting,“ segir Ingó um nýja lagið sem nefnist Gítarinn. 

Einn í dimmu húsi

„Þetta lag var samið áður en ég fékk bestu fréttir lífs míns að ég væri að verða faðir sem hefur einnig hvatt mann til að einblína á allt sem er jákvætt,“ segir Ingó sem eignaðist sitt fyrsta barn í fyrra. 

Lagið er komið út á Spotify en í textanum syngur Ingó meðal annars:

„Hann á endalaust af minningum en eru þær þess virði ef þú endar undir áhrifum á bar í Hafnarfirði?“

Ingó syngur um að gera allt fyrir frægð og frama en einnig nauðsyn þess að þurfa að deyfa sig til að þykjast hafa gaman.

„Hann þoldi illa umtal enda viðkvæm litla sálin. Ný kærasta á hverjum stað, sem flækti bara málin. Hann kynntist fólki úti um allt sem sagðist hafa trúna. Nú er frægðarsólin sest, svo hvar eru þau núna? Hann situr einn í dimmu húsi, enginn honum hjá. Gítarinn er það eina sem hann á.“

Gítarleikarinn í lagi Ingó hugsar til baka, til kærustunnar sem hann hrakti frá sér með drykkju og lélegri forgangsröðun. 

„Hann ætti kannski að biðja einhverja afsökunar á öllu, eða þá sem ekki skilja að þetta var hans köllun.“

Hann þorir ekki að hringja og semur því bara lag. 

Afbókanir og tekjutap

Lagið markar endurkomu Ingó Veðurguðs aftur í tónlistarbransann. Eins og kom fram á Vísi í lok síðasta árs stefnir Ingó á að halda stórtónleika í Háskólabíói í mars á þessu ári. Nú er hann einnig byrjaður að gefa út tónlist eftir nokkurra mánaða hlé. 

Í júlí árið 2021 urðu kaflaskil í lífi tónlistarmannsins þegar reynslusögur yfir tuttugu kvenna sem greindu frá meintu kynferðisofbeldi og áreitni af hans hálfu á samfélagsmiðlinum Tik Tok. Sögurnar birtust nafnlausar á Tik Tok reikningi hópsins Öfga. 

Pistill Andreu Aldan Hauksdóttur birtist svo undir nafni og fór í dreifingu en í honum opinberaði hún samskipti sín Ingó á skemmtistaðnum Oliver árið 2009 þegar hún var nítján ára gömul.

Í kjölfarið af ásökununum var Ingó afbókaður á brekkusönginn á Þjóðhátíð og sömuleiðis á menntaskólaböllum. Þriðju þáttaröð af Í kvöld er gigg var aflýst og fundinn var nýr tónlistarmaður til þess að leika Danny í uppsetningunni á Grease. 

Ingó fór í kjölfarið í hart og krafði nokkra einstaklinga um bætur vegna ummæla á samfélagsmiðlum. Fór hann með eitt málið alla leið í Landsrétt þar sem það bíður úrlausnar.


Tengdar fréttir

Ingó hyggur á stór­tón­leika í Há­skóla­bíó í mars

Ingólfur Þórarinsson, betur þekktur sem Ingó veðurguð, hyggst halda stórtónleika í Háskólabíó á nýju ári. Samkvæmt heimildum fréttastofu verða tónleikarnir haldnir undir yfirskriftinni „Loksins gigg“, föstudaginn 10. mars. Formleg miðasala er ekki hafin en vinir og vandamenn hafa verið beðnir um að taka kvöldið frá.

Ingó veðurguð og Alexandra eignuðust son

Tónlistarmaðurinn Ingólfur Þórarinsson, einnig þekktur sem Ingó veðurguð, er orðinn pabbi. Hann tók á móti sínu fyrsta barni ásamt kærustu sinni Alexöndru Eir Davíðsdóttur. Drengurinn kom í heiminn þann 9. október. Smartland greindi fyrst frá. 

Sandy er komin með nýjan Danny

Jóhanna Guðrún, sem fer með hlutverk Sandy, er komin með nýjan Danny í Grease tónleikasýningunni og er það enginn annar en Magnús Kjartan Eyjólfsson sem tekur við hlutverkinu. Leikstjórn sýningarinnar er í höndum Grétu Salóme.

Ingó áfrýjar til Landsréttar

Ingólfur Þórarinsson mun áfrýja dómi Héraðsdóms Reykjavíkur sem féll 30. maí síðastliðinn. Héraðsdómur sýknaði Sindra Þór Sigríðarson Hilmarsson af stefnu Ingólfs um meiðyrði.

„Þetta snýst fyrst og fremst um þolendur“

Sindri Þór Sigríðarson Hilmarsson, sem var í dag sýknaður af stefnu Ingólfs Þórarinssonar, tónlistarmanns, um meiðyrði. Hann segir niðurstöðuna skipta mestu máli fyrir þolendur. Sýkna hans þýddi að segja mætti hlutina fullum fetum.






Fleiri fréttir

Sjá meira


×