Innlent

Efling vill að skipaður verði nýr sáttasemjari

Heimir Már Pétursson skrifar
Sólveig Anna Jónsdóttir segir engar tilraunir hafa verið gerðar til að miðla málum í deilu Eflingar við SA frá því miðlunartillaga ríkissáttasemjara var lögð fram. Hann hafi í raun aldrei komið á eiginlegum samningaviðræðum í deilunni.
Sólveig Anna Jónsdóttir segir engar tilraunir hafa verið gerðar til að miðla málum í deilu Eflingar við SA frá því miðlunartillaga ríkissáttasemjara var lögð fram. Hann hafi í raun aldrei komið á eiginlegum samningaviðræðum í deilunni. Vísir

Formaður Eflingar segir félagið ekki treysta ríkissáttasemjara til að leiða frekari viðræður við Samtök atvinnulífsins og vill að nýr einstaklingur verði fundinn í hans stað. Félagið gafst einnig upp á biðinni eftir úrskurði vinnumarkaðsráðherra á stjórnsýslukæru vegna miðlunartillögu ríkissáttasemjara og kærði tillöguna til Héraðsdóms í dag.

Atburðarásin í kjaradeilu Eflingar og Samtaka atvinnulífsins heldur áfram að þróast. Í dag ákvað forysta Eflingar að draga stjórnsýslukæru sína til félags- og vinnumarkaðsráðherra vegna miðlunartillögu ríkissáttasemjara sem lögð var fram á mánudag til baka og kæra framlagningu tillögunnar þess í stað til Héraðsdóms.

Sólveig Anna Jónsdóttir segir Eflingu hafa lýst vantrausti á ríkissáttasemjara. Hann geti því ekki miðlað málum í deilu félagsins við Samtök atvinnulífsins og skipa þurfi nýjan í það hlutverk.Stöð 2/Arnar

Sólveig Anna Jónsdóttir segir viðbrögð ráðuneytisins við stjórnsýslukærunni hafa verið alltof sein.

„Þannig að við höldum að þetta sé skynsamari og betri leið fyrir okkur að fara. Einnig í ljósi alvarleika málsins, þá er þetta eðlilegri staður til að fara á teljum við,“ segir Sólveig Anna.

Það er stór dagur í deilunni á morgun þegar málflutningur fer fram í máli Samtaka atvinnulífsins gegn Eflingu í Félagsdómi um friðarskyldu deiluaðila eftir að miðlunartillaga hefur verið lögð fram. Þá verður einnig málflutningur í máli ríkissáttasemjara fyrir Héraðsdómi þar sem hann krefst úrskurðar um að Eflingu beri að afhenda embættinu kjörskrá sína svo hægt verði að greiða atkvæði um miðlunartillögu hans. Á morgun hefst einnig atkvæðagreiðsla um viðbótarverkföll á hótelum og hjá bílstjórum olíufélaga og Samskipa.

Mikil málaferli hafa skapast vegna stöðunnar sem komin er upp í kjaradeilu Eflingar og SA. Á morgun hefst síðan atkvæðagreiðsla um víðtækari verkfallsaðgerðir en þegar hafa verið samþykktar.Grafík/Sara

Sólveig Anna segir málatilbúnað Samtaka atvinnulífsins um friðarskyldu um leið og Eflingu hafi verið afhent miðlunartillaga fáránlegan.

„Þetta er náttúrlega eins langsótt og furðulegt eins og hægt er að hugsa sér. Við erum ekki á svipaðri vegferð. Okkar málatilbúnaður er í engu langsóttur eða furðulegur. Hann er tengdur raunveruleikanum sem við búum í. Við teljum að miðlunartillagan sé ólögleg,“ segir formaður Eflingar.

Það sama eigi við um framferði ríkissáttasemjara; hvernig tillagan var unnin og lögð fram brjóti einnig gegn lögum sem honum beri að starfa undir. Það væri mikilvægt að skera úr um þetta með skýrum og skjótum hætti.

Sólveig Anna segir engar sáttamiðlanir hafa átt sér stað frá því miðlunartillagan var lögð fram. Í raun hafi ríkissáttasemjari aldrei gert heiðarlega tilraun til að miðla málum og því væri þessi staða komin upp.

Aðalsteinn Leifsson ríkissáttasemjari hefur ekki getað framkvæmt atkvæðagreiðslu um miðlunartillögu sína vegna þess að Efling hefur neitað að afhenda kjörskrá félagsins.Vísir/Vilhelm

„Á þessum tímapunkti er það auðvitað svo að stjórn Eflingar hefur lýst vantrausti á ríkissáttasemjara. Þannig að ég get ekki séð að hann gæti tekið að sér á þessum tímapunkti að miðla einhverju í þessari deilu.“

Efling muni hlýða lögbundinni skyldu og svara kalli sáttasemjara um fund en þaðmyndi ekki skila árangri. Það ætti að vera lítið mál fyrir vinnumarkaðsráðherra að leysa úr því.

„Og setja einhvern sem bæri þá titilinn aðstoðarríkissáttasemjari í deiluna. Það held ég ef viljinn væri fyrir hendi væri ekki erfitt að gera,“ segir Sólveig Anna Jónsdóttir.


Tengdar fréttir

Sér ekki möguleika á samningum nema Aðalsteinn stígi til hliðar

Sólveig Anna Jónsdóttir formaður Eflingar segir að skipa þurfi vararíkissáttasemjara ef kalla eigi Eflingu og Samtök Atvinnulífsins aftur að samningsborðinu. Efling hefur dregið stjórnsýslukæru sína vegna miðlunartillögu sáttasemjara til baka og þess í stað kært hana til héraðsdóms. 

Efling skýtur lög­mæti miðlunar­til­lögunnar til héraðs­dóms

Efling hefur ákveðið að skjóta kröfu sinni um ógildingu miðlunartillögu ríkissáttasemjara til Héraðsdóms Reykjavíkur. Þetta gerir félagið vegna viðbragðsleysis Guðmundar Inga Guðbrandssonar vinnumarkaðsráðherra við stjórnsýslukæru Eflingar.

Víð­tækari að­gerðir Eflingar munu hafa lamandi á­hrif

Víðtækar aðgerðir sem Efling boðaði til í dag munu lama starfsemi flestra stærstu hótela borgarinnar, dreifingu eldsneytis um landið og hafa mikil áhrif á dreifingu Samskipa á vörum. Félagsdómur tók fyrir í dag stefnu Samtaka atvinnulífsins gegn Eflingu vegna boðun verkfalla sem eiga að hefjast á þriðjudag.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×