Innlent

Útlendingafrumvarpið eina þingmálið á dagskrá

Hólmfríður Gísladóttir skrifar
Arndís Anna Kristínardóttir Gunnarsdóttir, þingmaður Pírata.
Arndís Anna Kristínardóttir Gunnarsdóttir, þingmaður Pírata. Vísir/Vilhelm

Alþingi kemur saman á ný í dag og hefst þingfundur klukkan 15. Á dagskrá er óundirbúinn fyrirspurnartími og önnur umræða um útlendingafrumvarp Jóns Gunnarssonar dómsmálaráðherra.

Umræðum um frumvarpið var frestað fyrir jól en það er afar umdeilt og gera má ráð fyrir löngum fundum um málið áður en niðurstaða liggur fyrir.

Óli Björn Kárason, þingflokksformaður Sjálfstæðisflokksins, segist í samtali við Morgunblaðið gera ráð fyrir að annarri umræðu um málið verði lokið áður en önnur mál verða tekin á dagskrá. 

Arndís Anna Kristínardóttir Gunnarsdóttir, þingmaður Pírata, segir málið kalla á miklar umræður og að ekki sé ólíklegt að þingfundir muni vara fram á kvöld næstu daga. „Það eru í rauninni vonbrigði að meirihlutinn hafi ekki dregið [málið] til baka. Þetta mál er illa unnið,“ sagði hún í samtali við Morgunblaðið.

Fjöldi ungliðahreyfinga sendi frá sér yfirlýsingu í gær þar sem frumvarpinu er mótmælt og skorað á dómsmálaráðherra og ríkisstjórn Katrínar Jakobsdóttur að draga það til baka. 

Þá er lýst yfir stuðningi við umsagnir Amnesty International, Rauða krossins, Unicef, UN Women og Þroskahjálpar og fleiri samtaka, þar sem gerðar voru verulegar athugasemdir við frumvarpið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×