Óskar Hrafn um Klæmint: Við höfum saknað þess að hafa hrein­ræktaða níu

Klæmint hefur leikið 373 leiki fyrir NSI í Betri deildinni í Færeyjum og skorað í þeim 230 mörk. Hann varð fyrstur til að skora tvö hundruð mörk í efstu deild í Færeyjum, hefur orðið markakóngur deildarinnar sex sinnum og er markahæsti landsliðsmaður Færeyja frá upphafi með tíu mörk.

Ríkharð Óskar Guðnason ræddi við Óskar Hrafn Þorvaldsson, þjálfara Blika, um nýja leikmanninn.

„Hann gefur okkur bara gæði inn í teignum. Þetta er margreyndur markaskorari með mikla reynslu, bæði úr færeysku deildinni en síðan hefur hann líka skorað og staðið sig í Evrópukeppninni með NSÍ Runavík,“ sagði Óskar Hrafn Þorvaldsson.

„Við búumst við að við fáum markaskorara og svona sanna níu,“ sagði Óskar Hrafn. Þetta er annar Færeyingurinn á stuttum tíma sem kemur til Breiðabliks því áður hafði liðið fengið Patrik Johannesen frá Keflavík. Eru hann og Klæmint líkir leikmenn?

„Nei, eina sem þeir eiga sameiginlegt er að þeir eru Færeyingar. Patrik er allt öðruvísi því hann vinnur meira fyrir aftan Klæmint og í rauninni alhliða sóknarmaður. Hann getur líka spilað framarlega á miðjunni,“ sagði Óskar Hrafn.

„Við sjáum þá ekki sem sama leikmanninn því Klæmint er hreinræktuð nía sem við höfum ekki haft síðan að Árni Vil var. Árni var kannski ekki einu sinni hreinræktuð nía því hann gerði margt annað. Ég myndi því segja síðan Thomas Mikkelsen fór af landi brott,“ sagði Óskar.

„Við höfum saknað þess að hafa svoleiðis mann og þótt að Ísak [Snær Þorvaldsson] væri frábær í teignum þá var hann heldur ekki hreinræktuð nía. Þetta er vonandi enn eitt vopnið í vopnabúrið okkar,“ sagði Óskar.