Innlent

Innlögnum fjölgaði í nóvember og áfram nokkur dauðsföll á mánuði

Fanndís Birna Logadóttir skrifar
Guðrún Aspelund sóttvarnalæknir biðlar til fólks að huga að sóttvörnum fyrir hátíðirnar og samkomurnar sem þeim fylgja. 
Guðrún Aspelund sóttvarnalæknir biðlar til fólks að huga að sóttvörnum fyrir hátíðirnar og samkomurnar sem þeim fylgja.  Vísir/Egill

Enn er nokkur fjöldi að greinast með Covid hér á landi og fjölgaði innlögnum nokkuð mikið í nóvember. Þá látast að meðaltali tveir til fjórir á mánuði vegna Covid. Sóttvarnalæknir hvetur fólk til að fara varlega yfir hátíðirnar, fara í örvunarbólusetningu og huga að sóttvörnum.

Guðrún Aspelund sóttvarnalæknir segir faraldurinn nokkuð stöðugan hér á landi þar sem áfram er ákveðinn hópur að smitast og hluti þeirra að veikjast alvarlega.

„Þetta eru kannski 30 til 40 manns í þessum opinberum prófum en við vitum að það eru fleiri en það með sjúkdóminn. Það sem gerðist í nóvember var að það jukust innlagnir og þá aðallega á Landspítalanum. Í fyrradag voru þetta 25 sem voru inniliggjandi en í byrjum mánaðar voru þetta meira bara fimm til átta,“ segir Guðrún.

Enn eru einstaklingar að látast vegna Covid og að sögn Guðrúnar hafa dauðsföllin verið um tvö til fjögur á mánuði. Frá janúar til september 2022 voru 180 dauðsföll skráð og viðbúið að þeim muni fjölga. „Fólk er að deyja, þó það séu bara nokkrir þá eru það samt þeir og það er erfitt fyrir þeirra fólk, þeirra fjölskyldu og alla. Þetta er alvarlegt mál,“ segir Guðrún.

Bóluefnin og sóttvarnir helsta vörnin

Ákveðið var á dögunum að hvetja fólk eldri en 60 ára til að mæta í örvunarbólusetningu, þar sem eldri einstaklingar eru í meiri hættu á að veikjast alvarlega. Þáttakan hefur að sögn Guðrúnar verið góð en mætti vera betri, sérstaklega hjá þeim sem eru 60 til 70 ára en um helmingur þeirra hefur fengið fjórða skammtinn.

„Vörnin af bólusetningu dvínar á nokkrum mánuðum, hún fer ekkert niður í núll en hún minnkar. Það eru rannsóknir sem styðja það og þess vegna erum við að hvetja fólk til þess ef það er kominn tími, þrír eða fjórir mánuðir, að fólk fari þá í örvunarbólusetningu, þeir sem að hafa ekki gert það,“ segir Guðrún.

Það er þó ekki aðeins Covid sem verið er að glíma við heldur eru ýmsar pestir að herja á landann, þar á meðal inflúensa, RS-veiran, sem leggst þó aðallega á lítil börn og eldri fólk, og nóró niðurgangspestin. Nú þegar hátíðirnar eru í nánd og samkomur eru víða segir Guðrún full ástæða fyrir fólk til að fara varlega.

„Vörnin sem við höfum er náttúrulega bólusetningar gegn Covid og inflúensu og svo sóttvarnir, það er að fólk reyni að vera heima þegar það er veikt og smiti ekkert aðra því það getur alltaf borist inn í veika hópa eða til viðkvæmra einstaklinga eins og ónæmisbældra, sem að kannski þrátt fyrir bólusetningu geta orðið mjög veikir,“ segir hún.

Fylgjast með þróuninni erlendis

Aðspurð um hvort fylgst sé sérstaklega með þróuninni þegar kemur að Covid, í ljósi frétta til að mynda frá Kína, segir Guðrún svo vera en að helst sé fylgst náið með Norðurlöndunum og funda þau reglulega með kollegum sínum þar. Í flestum löndum sé Covid á niðurleið.

„Það er svona aðeins misjafnt eftir löndum, það eru alltaf einhver lönd sem eru öðruvísi. Það eru kannski alltaf þrjú eða fjögur lönd þar sem þetta er á uppleið þó það sé á niðurleið í hinum löndunum en almennt er þetta svona frekar á niðurleið,“ segir hún.

Frétta­stofa Stöðvar 2, Vísis og Bylgjunnar tók saman helstu Covid tíðindin á árinu í annál sem birtist á Vísi í gær en horfa má á hann í heild í spilaranum hér fyrir neðan.


Tengdar fréttir

Út­breiddustu mót­mæli í Kína í rúm­lega þrjá­tíu ár

Mótmæli sem brutust út í fjölda kínverskra borga um helgina eru sögð þau mestu frá því í stúdentauppreisninni sem var barin niður í blóðbaði á Torgi hins himneska friðar árið 1989. Reiði vegna strangra og langvarandi sóttvarnaaðgerða var kveikjan að mótmælunum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.