Lífið

Desemberspá Siggu Kling - Hrúturinn

Sigga Kling skrifar

Elsku Hrúturinn minn, þó það sé búinn að læðast að þér leiðindaótti sem jafnvel hefur hindrað þinn góða svefn og hvíld, þá ertu búinn að hafa miklu fleiri sigra en ósigra á síðustu mánuðum. Þú þyrftir að skrifa niður hvað er búið að ganga vel svo það festist í frumum og minni.

Vegna þess að orkan þín laðar frekar að þér að hugsa um leiðindin heldur en allt það ljósa og bjarta sem er að gerast hjá þér.

Þú ert týpan sem þarft að ögra þér til að taka áhættu og gefa ekki nein leyfi á það að þú sért bara þræll annarra. Því þú hefur bæði útsjónarsemi, visku og dugnað, það er það eina sem þú þarft að vita.

Svo stingdu þér út í djúpu laugina og horfðu ískalt í augu við óttann og þú kemst að því að hann var alls ekkert eins merkilegur og þú hélt.

Ef þú hefur þá tilfinningu að þú sért einn og yfirgefinn þá skaltu standa upp og gera eitthvað í því. Því að þetta þarf ekki að vera svona, heldur festir þú þig sjálfur á þessum stað sem þú ert. Þetta á við dálítinn part af Hrútsmerkinu, varð að bæta því við.

Þér vegnar vel í fjármálum þó að það hafi komið sá tími að það sé alls ekki að ganga eins og þú vildir. Það koma töluvert stórar fjárhæðir eða peningasumma út úr einhverju sem ég sé ekki alveg hvað er.

Þú átt eftir að leika þér og að vinna mikið í þessum mánuði, að undirbúa og vera snar í hugsun. Og karlmenn í þessu merki gefa sér hugrekki til að elska og njóta, en þið konurnar verðið að vita að þið eigið að taka fyrsta skrefið og ná í manninn sem er ætlaður ykkur.

Trygglyndi og staðfesta þín er einstök og ef þú ert búinn að binda þig, kominn í fast samband þá eiga þau tengsl eftir að batna en ekki vera að breyta þeirri manneskju sem þú féllst fyrir, því hún er einstök eins og hún er.

Knús og kossar, Sigga Kling






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.