Desemberspá Siggu Kling - Meyjan

Þú sérð það fyrst þegar þú nærð þeim þroska að láta ekki umhverfið eða annað fólk stjórna þinni líðan. Það er eðlilegt að detta í kvíða fyrir því sem yfir þig hefur dunið, en yfirleitt er sá kvíði horfinn eftir fimm mínútur.

Lífið er að gerast á of miklum hraða, því skaltu tileinka þér að hægja á þínum hraða. Þú veist það kannski ekki en í hjarta þínu er svæði sem er eins og lítill heili sem hefur allavega 40 þúsund taugafrumur. Þegar þú strýkur fallega um hjarta þitt og andar rólega en djúpt, þá verðurðu sterkari í þeim aðstæðum sem þú lendir í. Því í okkar heila býr nefnilega egóið og það á það til að geta haft svo mikið tangarhald á okkur að við getum ekki hugsað rétt.

Þú ert búin að vera dugleg að gera allskonar til þess að hressa upp á tilveruna. Og þó að eitthvað sem þú framkvæmir gangi ekki alveg upp, þá er bara allt í lagi að sleppa tökunum á því. Það gerir þig sterkari og lætur þér líða betur.

Ástin gerir kröfu um að þú einbeitir þér betur að þeim sem þú virkilega elskar og lífið er of stutt, svo ekki hanga með leiðinlegri persónu. Það er líka gott fyrir þig að hreinsa svolítið út af vinalistanum. Því að ef þú gefur þeim of mikinn tíma sem ekki efla þig á nokkurn máta, þá er hægt að segja að þú eyðir tímanum í vitleysu.

Tækifæri sem tengjast veraldlegum gæðum, nýrri atvinnu eða óvæntum peningum eru að bresta á eða eru nú þegar komin. Þar sem að þú ert svo há ljósvera, þá skaltu ekki dekra of mikið við myrkrið þegar dagurinn er, heldur kveikja öll ljós og brosa. Tími ferðalaga er í fókus og þetta reddast sem þú ert búin að vera að hugsa um.

Knús og kossar, Sigga Kling