Körfubolti

Valur rétt marði ÍR en Njarðvík burstaði Fjölni

Smári Jökull Jónsson skrifar
Valsliðið lenti í óvæntum vandræðum gegn botnliði ÍR.
Valsliðið lenti í óvæntum vandræðum gegn botnliði ÍR.

Valur vann nauman sigur á botnliði ÍR í Subway-deild kvenna í körfuknattleik í dag. Kiana Johnson skoraði sigurkörfuna þegar þrjár sekúndur voru eftir en ÍR hefur ekki unnið leik í deildinni í vetur. Þá vann Njarðvík stórsigur á Fjölni suður með sjó.

Fyrir leikinn í kvöld bjuggust flestir við öruggum sigri Vals gegn ÍR enda þær síðarnefndu sigurlausar eftir níu umferðir en Valskonur komnar með sex sigra í sinn poka.

Sú varð þó alls ekki raunin. Valur leiddi 28-19 eftir fyrsta leikhlutann en ÍR bætti varnarleik sinn í öðrum leikhluta og staðan í hálfleik 46-41 Val í vil.

Í síðari hálfleik var spennan síðan mikil. Valur hélt frumkvæðinu en ÍR missti þær aldrei of langt fram úr sér. Það munaði sex stigum á liðinu fyrir loka leikhlutann en í fjórða leikhlutanum tókst ÍR að minnka muninn en frekar og komst yfir í stöðunni 66-64 þegar rúmar fimm mínútur voru eftir.

Jafnt var á með liðunum eftir það. ÍR jafnaði úr tveimur vítaskotum þegar rúm mínúta var eftir og í kjölfarið fóru næstu sóknir liðanna forgörðum. Það var hins vegar Kiana Johnson sem hjó á hnútinn hjá Valskonum. Hún skoraði sigurkörfuna þegar þrjár sekúndur voru eftir og tryggði Val 76-74 sigur.

Johnson var stigahæst hjá Val með 28 stig og Ásta Júlía Grímsdóttir skoraði 16. Hjá ÍR skoraði Jamie Cherry einnig 28 stig og Greeta Uprus kom næst með 22 stig.

Í Njarðvík tóku Íslandsmeistararnir á móti Fjölni. Þar hafði Njarðvík yfirhöndina frá upphafi og var komið með nítján stiga forskot í leikhléi þar sem þær leiddu 54-35. Munurinn í síðari hálfleik varð mestur þrjátíu stig og aldrei spurning hvar sigurinn myndi enda.

Aliyah Collier skoraði 30 stig fyrir Njarðvík og Raquel Laneinro 14. Taylor Jones skoraði 31 stig fyrir Fjölni og var langstigahæst í þeirra herbúðum.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.