Íslenski boltinn

Jason Daði þarf að fara í að­gerð að loknu Ís­lands­mótinu

Runólfur Trausti Þórhallsson skrifar
Jason Daði Svanþórsson er algjör lykilmaður í liði Blika.
Jason Daði Svanþórsson er algjör lykilmaður í liði Blika. VÍSIR/HULDA MARGRÉT

Óskar Hrafn Þorvaldsson, þjálfari Íslandsmeistara Breiðabliks, mætti til Guðmundar Benediktssonar í Stúkuna í kvöld eftir að titillinn var kominn í hús. Þar staðfesti hann að Jason Daði, vængmaður liðsins, hefði spilað meiddur stóran hluta Íslandsmótsins og þyrfti að fara í aðgerð eftir tímabilið.

Stjarnan vann Víking 2-1 í kvöld og með því var ljóst að ekkert lið gæti náð Breiðabliki, toppliði Bestu deildar karla þó enn séu þrjár umferðir eftir af Bestu deildinni. Óskar Hrafn mætti í Stúkuna og fór yfir víðan völl.

Jason Daði var meiddur í aðdraganda Íslandsmótsins en það virðist ekki hafa komið að sök þar sem hann hefur skorað 11 mörk og lagt upp önnur átta í deild og bikar í sumar. Óskar Hrafn hrósaði 22 ára gamla vængmanninum í hástert í kvöld.

Óskar Hrafn sagði að frammistaða Mosfellingsins hefði ekki komið á óvart. „Hann þroskaðist sem einstaklingur og varð líkamlega sterkari,“ sagði þjálfarinn og bætti svo við:

„Jason Daði efur glímt við meiðsli seinni hluta tímabils. Hann hefur aldrei verið nægilega mikið meiddur til hvíla en hann þarf að fara í aðgerð eftir mót. Hann er mjög mikilvægur, allt sem hann kemur með að borðinu. Hreyfingarnar, dugnaðurinn og þekking á kerfinu. Hann er frábær leikmaður,“ sagði Íslandsmeistarinn Óskar Hrafn Þorvaldsson um leikmann sinn.




Fleiri fréttir

Sjá meira


×