Einar: Fínt að hafa læti og eitthvað að tala um

„Við vorum ekki alveg nógu kúl í hausnum. Þetta er stig, það er betra heldur en ekkert stig og við tökum það með okkur og svo er það áfram gakk,“ sagði Einar enn fremur þegar Vísir ræddi við hann eftir leik í kvöld.

Framarar leiddu lengst af í dag, náðu fjögurra marka forskoti í fyrri hálfleik en FH tókst að jafna fyrir hlé áður en Fram tók frumkvæðið á ný. Eins og Einar sagði gekk Frömurum á köflum ekki nógu vel að nýta sér stöðu þar sem þeir voru einum fleiri.

„Við erum bara með okkar útfærslur og höfum verið að gera þetta ágætlega. Við erum að skapa okkur færin en klikka úr dauðafærum. Á móti Stjörnunni förum við með tvö dauðafæri og í dag að minnsta kosti eitt ef ekki tvö. Okkur vantaði eitt mark í viðbót og þá hefðum við náð betri forystu en í staðinn fá þeir augnablikið með sér og gátu komist yfir,“ bætti Einar við en bæði lið fengu sóknir á lokamínútunni til að ná forystunni.

„Þetta er ekkert vesen. Við erum búnir að spila þrjá alveg rosalega jafna leiki, vinna einn og gera tvö jafntefli. Þetta er bara fín æfing fyrir okkur líka og við erum bara brattir.“

FH var aðeins búið að skora fjögur mörk þegar langt var liðið á fyrri hálfleikinn enda varnarleikur Fram öflugur.

„Við vorum mjög góðir varnarlega í dag en gerum klaufaleg mistök í vörninni sem við vorum búnir að fara vel yfir og ætluðum ekki að gera. Svona er þetta þegar er hátt spennustig í þessu. Ég hefði viljað vera kominn með meira forskot í seinni hálfleik og líka í fyrri hálfleik.“

„Phil Döhler (markvörður FH) var geggjaður í þessum leik. Mér fannst varnarleikurinn góður, markvarslan okkar datt aðeins í seinni hálfleik eftir frábæra markvörslu í fyrri hálfleik. Hún hrapar ansi hressilega í seinni hálfleiknum á meðan mér fannst vörnin standa vel allan leikinn. Svona er þetta, það er alltaf hægt að gera betur en við erum að spila á móti geggjuðu liði og tökum þetta stig bara.“

Undir lokin varð gríðarlega mikill hasar. Þorsteinn Gauti Hjálmarsson, leikmaður Fram, tók aukakast eftir að tíminn var runninn út og skaut beint í andlit leikmanns FH. Litlu munaði að hópslagsmál brytust út, menn tókust vel á og áhorfendur komnir ansi nálægt enda atvikið upp við stúkuna.

„Gauti bombar í andlitið á honum, ég held hann þoli ekki þennan gaur þannig að ég skil það vel að hann hafi bombað í andlitið á honum,“ sagði Einar glottandi með Þorstein Gauta standandi bakvið myndavélina.

„Svo bara „rest is history“. Ef þú horfir á mig þá er ég ekki líklegur til afreka í svona dæmi eins og gerðist í lokin þannig að ég stóð nú bara á þetta og horfði í rólegheitum. Þetta er bara stuð, það er fínt að hafa læti og eitthvað að tala um. Ég hafði gaman af að horfa á þetta,“ sagði Einar að endingu.