Tíska og hönnun

„Mér finnst fötin ekki skapa manninn heldur öfugt“

Dóra Júlía Agnarsdóttir skrifar
Fatahönnuðurinn Sædís Ýr er viðmælandi vikunnar í Tískutali.
Fatahönnuðurinn Sædís Ýr er viðmælandi vikunnar í Tískutali. Instagram @saedisyr

Það má með sanni segja að tískan einkenni líf og tilveru fatahönnuðarins Sædísar Ýrar en hún hefur vakið athygli fyrir litadýrð, glans og gleði í fatalínu sinni By Sædís Ýr. Hún hvetur fólk til að vera óhrætt við að finna sinn eigin stíl og fylgja sínu en það sem hún elskar mest við tískuna er hvað hún er fjölbreytt. Sædís Ýr er viðmælandi vikunnar í Tískutali.

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Það er svo ótrúlega margt sem ég elska við tísku en örugglega mest hvað hún er fjölbreytt. 

Það sem einum finnst hallærislegt og glatað finnst öðrum töff og æðislegt. 

Það er hægt að segja svo mikið án þess að þurfa að nota orð með því að klæðast því sem manni finnst sjálfum töff. Það er svo mikið af öðruvísi pælingum í gangi þegar að það kemur að tísku, fólk er í sífellu að reyna að búa til eitthvað nýtt og spennandi og blanda saman alls konar stílum og hugmyndum.

Hver er uppáhalds flíkin þín og af hverju?

Uppáhalds flíkin mín í dag er jakkafatadragt, kannski er það smá svindl því það eru tvær flíkur. Ég fékk fallega Sævar Karls dragt frá pabba mínum sem hann var hættur að nota og ég nota hana næstum á hverjum degi. Jakkinn er svo flottur oversized með risa axla púðum og mér finnst hann passa við öll fötin mín sama hvort það sé kjóll sem ég er í innan undir eða hettupeysa. Buxurnar eru líka frekar stórar en ég þrengdi þær í mittinu og finnst þær gefa svona 80’s executive realness blæ. Ég get notað þessar flíkur saman og sitthvoru lagi og ég dýrka hvað er hægt að nota þær við mikið af mismunandi lookum.

Eyðirðu miklum tíma í að velja föt hverju sinni?

Það fer alveg eftir því hvað ég er að fara að gera hvort ég sé lengi að velja mér föt eða ekki.

 Vanalega ef ég er að fara í eitthvað planað partý eða veislu sauma ég mér eitthvað sérstaklega fyrir það. 

Þá tekur í rauninni engan tíma fyrir mig að velja í hverju ég á að vera en það tekur auðvitað tíma að gera outfittið. En ef það er meira spontant þá get ég verið heillengi að velja mér í hverju ég á að vera en það er alltaf gaman. 

Að róta í fötunum og finna eitthvað til sem ég hafði ekki ímyndað mér saman en gengur upp er kvíðafullt stuð.

Hvernig myndirðu lýsa stílnum þínum?

Bara gleði. Ég elska liti og munstur og að setja hluti saman á óhefðbundin hátt. Mér finnst gaman að blanda saman litum en dýrka líka að vera alveg monochrome ef liturinn er sterkur eins og barbie bleikur eða pastel blár.

Hefur stíllinn þinn breyst mikið í gegnum tíðina og hvernig þá?

Já, þegar ég var í menntaskóla fylgdist ég mikið með tísku en þorði kannski ekki alltaf að vera alveg ég þegar að það kom að því að setja saman look

Með tímanum fékk ég meira sjálfstraust og byrjaði að þora að klæða mig alveg eins og mig langar.

Hvaðan sækirðu innblástur í tískunni?

Ég elska að skreppa á stað innra með mér og setja þar saman pælingar í mínum eigin heimi um hvað mig langar að sýna og framkalla í mínum stíl og hönnun. 

Ég get fengið innblástur frá málverki með fallegum litatónum, konu að labba fram hjá mér eða frá náttúrunni. Innblástur er einhvern veginn alls staðar í kringum okkur.

Ertu með einhver boð og bönn þegar það kemur að klæðaburði?

Nei, alls ekki. Ef mér finnst eitthvað flott þá geng í ég í því alveg óháð því hvað einhverjum öðrum finnst. 

Mér finnst fötin ekki skapa manninn heldur öfugt, ég fer í föt sem endurspegla mig og minn persónuleika. 

Það er svo skemmtilegt að geta tjáð sig með fötum og jafnvel sagt sögur í gegnum föt. Það er ákveðið frelsi og tjáning þegar það kemur að því að skapa sinn stíl og finnst mér ekki að það eigi að vera neinar hömlur á því hvernig fólk kýs að tjá sig í gegnum klæðaburð.

Hver er eftirminnilegasta flík sem þú hefur klæðst og af hverju?

Úff, það er svo erfitt að velja bara eina flík. En af öllum mínum flíkum er ísdrottningin örugglega sú eftirminnilegasta. 

Það er sem sagt kjóll sem ég hannaði og saumaði úr silfurlituðu efni sem er oftast notað í jólaskraut. 

Ég saumaði hann í litlu stúdíó íbúðinni minni og þurfti að nota stigaganginn til að sníða hann. Hann er algjör prinsessu kjóll og verð ég alltaf svo ánægð þegar að ég sé hann hangandi inn í skáp ég á svo margar minningar með honum. 

Ég var í honum á tískusýningu sem ég hélt í sumar en hef fengið að nota hann í mörgum verkefnum sem ég hef verið í eða tekið þátt í. Þessi kjóll hefur fylgt mér núna í tvö ár og mun ég aldrei sleppa honum.

Býrðu yfir einhverju góðu ráði þegar það kemur að tísku?

Ekki vera hrædd/hræddur/hrætt við að skapa þinn stíl og vera trú/trúr því sem þér finnst vera töff og æðislegt. 

Við erum öll öðruvísi og það er ekkert gaman að reyna að eltast við að vera eins og einhver annar.

Tengdar fréttir

„Finnst lítið spennandi að fara í jakkaföt og skyrtu“

Förðunarfræðingurinn Ísak Freyr Helgason hefur starfað innan tískuheimsins í langan tíma og farðað hinar ýmsu stórstjörnur, á borð við Íslandsvinkonuna Katy Perry og Dua Lipa. Hann elskar hvað tískan er breytileg og hefur farið í gegnum ólík tímabil í klæðaburði en hallast núna að andro stíl og hefur alltaf verið hrifinn af litum og munstrum. Ísak Freyr er viðmælandi vikunnar í Tískutali.

„Rokkstjörnustælar og bling“

Litagleði, gelluvíbrur og rokkstjörnu stælar einkenna Júlíu Grönvaldt, sem starfar sem listrænn stjórnandi og stílisti við fjölbreytt verkefni tengd tísku, menningu og listum. Hún lærði tískumiðlun í Flórens á Ítalíu en flutti heim eftir námið til að vinna sem sjálfstætt starfandi og elskar að geta notað ástríðu sína á tísku í starfi. Júlía er viðmælandi vikunnar í Tískutali.

„Munur á því að fá innblástur og að stela hugmyndum annarra“

Diana Rós Hanh Breckmann er sjálfstætt starfandi tískustílisti sem hefur alltaf leyft sér að prófa og þróa alls konar stíla. Hún velur sér föt samkvæmt skapi og stemningu og er hrifin af austur asíska götustílnum í bland við metal fíling. Diana Rós er viðmælandi vikunnar í Tískutali.

Í of áberandi kjól fyrir Versali

Brynja Kúla Guðmundsdóttir er óhrædd við að fara eigin leiðir í fatavali og lýsir stíl sínum sem áberandi og litríkum. Hún segir ónauðsynlegt að takmarka sig við einhvern einn stíl og að engar reglur gildi í leik tískunnar. Brynja Kúla er viðmælandi vikunnar í Tískutali.

„Smitandi þegar fólk er ánægt með klæðaburðinn sinn“

Elma Dís Árnadóttir finnur fyrir mikilli hamingju þegar hún klæðist litríkum og glitrandi flíkum og segir stílinn sinn hafa þróast með sér í gegnum árin. Henni finnst mikilvægast að fólk sé samkvæmt sjálfu sér í klæðaburði og elskar að sjá það klæða sig eins og þeim sjálfum finnst flott. Elma Dís er viðmælandi vikunnar í Tískutali.

„Fyrir mig er þetta hugarleikfimi“

Ármann Reynisson er mikill lífskúnstner sem hefur bæði áhuga og þekkingu á tísku og klæðaburði og segir góða hugarleikfimi að setja saman flíkur fyrir hin ýmsu tilefni. Ármann hefur ferðast víða um heiminn og skrifað tuttugu og tvær vinjettubækur en í október næstkomandi kemur tuttugasta og önnur bókin út. Hann hefur gaman að því að klæða sig upp fyrir hin ýmsu tilefni, er alltaf snyrtilegur til fara og samkvæmur sjálfum sér. Hann bjó um tíma í London þar sem hann lagði stund á viðskiptanám og segir menningarlíf borgarinnar ekki hafa verið síðri lærdóm. Ármann Reynisson bauð blaðamanni í kaffi og veitti innsýn í fataskáp sinn sem býr yfir fataúrvali sem spannar um fjörutíu ár. Hann er viðmælandi vikunnar í Tískutali.

„Eitthvað sem mér finnst asnalegt í dag getur mér fundist geggjað á morgun“

Björn Ásgeir Guðmundsson er 23 ára hagfræðingur sem hefur mikinn áhuga á tísku og er óhræddur við að skína skært í fatavali. Hann er með mikið jakkablæti og sækir innblástur víða en segir móður sína vera eina mestu tískufyrirmyndina. Björn Ásgeir er viðmælandi vikunnar í Tískutali.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.