Ingi­björg Sigur­jóns­dóttir er hand­hafi Guð­mundu­verð­launanna

Verðlaunin eru nánar tiltekið afhending úr Listasjóði Guðmundu S. Kristinsdóttur, og voru verðlaunin í ár veitt í tilefni 90 ára afmælis listamannsins Erró í dag, 19. júlí.  Styrkveitingin fór fram við hátíðlega afhöfn í Hafnarhúsi. Safnstjóri Listasafns Reykjavíkur, Ólöf Kristín Sigurðardóttir bauð gesti velkomna og Dagur B. Eggertssson borgarstjóri afhenti styrkinn.

Ingibjörg Sigurjónsdóttir, handhafi verðlaunannar í ár, er fædd í Reykjavík árið 1985. Hún lauk BA gráðu frá myndlistardeild Listaháskóla Íslands árið 2010 og hefur tekið þátt í sýningum, gjörningum og öðrum verkefnum bæði á Íslandi og erlendis. 

Í tilkynningu frá Listasafni Reykjavíkur segir að Ingibjörg hafi starfað með öðrum listamönnum bæði að sköpun en einnig sem sýningarstjóri og við texta gerð um myndlist auk þess sem hún er ein af aðstandendum Kling og Bang sem nú starfar í Marshallhúsinu.

Ingibjörg vinnur fjölbreytt myndlistarverk jafnt þrívíða skúlptúra, lágmyndir og rýmisverk sem teikningar og málaðar myndir. 

„Fundinn efniviður sem oft lætur ekki mikið yfir sér er henni hugleikinn. Verk Ingibjargar einkennast af hverfulleika sem endurspeglast í efnisvalinu og ekki síður framsetningu verkanna . Hún teflir oft á tæpasta vað þegar kemur að því að ögra lögmálum stöðugleika og þyngdar þannig að áhorfandinn skynjar að undir býr áhætta um leið og mýkt og næmi einkenna verkin,“ segir jafnframt í tilkynningunni.