Fótbolti

Ari og félagar fyrstir til að vinna toppliðið | Alfons lék allan leikinn í sigri

Hjörtur Leó Guðjónsson skrifar
Ari Leifsson í treyju Strömsgodset, númer 2.
Ari Leifsson í treyju Strömsgodset, númer 2. mynd/godset.no

Fjórir leikir fóru fram í norsku úrvalsdeildinni í fótbolta í dag og voru Íslendingar í eldlínunni í tveimur þeirra. Ari Leifsson og félagar hans í Strømsgodset unnu öruggan 3-0 sigur gegn áður taplausu toppliði Lillestrøm og Alfons Sampsted og félagar hans í Bodø/Glimt unnu 2-0 sigur gegn Ålesund.

Markalaust var að loknum fyrri hálfleik þegar Strømsgodset og Lillestrøm áttust við. Heimamenn í Strømsgodset tóku svo forystuna á 53. mínútu og staðan var orðin 2-0 þegar um stundarfjórðungur var til leiksloka.

Gestirnir í Lillestrøm þurftu svo að leika manni færri seinustu mínútur leiksins eftir að Gjermund Asen lét reka sig af velli og heimamenn gengu á lagið og bættu þriðja markinu við í uppbótartíma.

Ari Leifsson lék allan leikinn í hjarta varnarinnar hjá Strømsgodset sem nú er með 20 stig í fjórða sæti deildarinnar eftir 12 leiki. Hólmert Aron Friðjónsson kom inn af varamannabekknum fyrir Lillestrøm þegar um 15 mínútur voru til leiksloka. Lillestrøm trónir enn á toppi deildarinnar með 27 stig, en eins og áður segir var þetta fyrsta tap liðsins á tímabilinu.

Þá lék Alfons Sampsted allan leikinn í liði Noregsmeistara Bodø/Glimt sem unnu 2-0 sigur gegn Ålesund. Alfons og félagar sitja í fimmta sæti deildarinnar með 19 stig, en Ålesund í því áttunda með 16 stig.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.