Erlent

Sviss­lendingar loka loft­helginni vegna tölvu­bilunar

Atli Ísleifsson skrifar
Frá flugvellinum í Zürich í nótt.
Frá flugvellinum í Zürich í nótt. EPA

Flugmálayfirvöld í Sviss lokuðu lofthelgi landsins tímabundið vegna tölvubilunar í nótt og hefur flugferðum til og frá flugvöllum í landinu verið aflýst.

Greint var frá þessu í nótt eftir að fréttir bárust af því að öll flugumferð til og frá Genf og Zürich hafði verið stöðvuð.

Svissneska flugumferðarstjórnarsíðan Skyguide segir að tæknibilun skömmu eftir miðnætti hafi leitt til þess að lofthelginni hafi verið lokað af öryggisástæðum. Einhverjum flugum á leið til Sviss var beint til Mílanó á Ítalíu vegna þessa.

Talsmaður Skyguide segir í samtali við svissneska fjölmiðla að talið sé að um bilun í tölvubúnaði sé að ræða og að ekki sé talið að um árás hafi verið að ræða. Unnið sé að viðgerð.

Flug til og frá alþjóðaflugvellinum Basel-Mulhouse héldu áfram líkt og venjulega þar sem flugvöllurinn er í Frakklandi og franskri lofthelgi, þó að borgin Basel sé í Sviss.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×